Transportonin me gomone 300
kg kanabis në Itali,2 në pranga

Një gomone me 300 kilogramë drogë e nisur nga Shqipëria drejt Italisë është kapur në një distancë 24.8 milje nga grykëderdhja e lumit Vjosa, ndërsa janë arrestuar dy shqiptarë. Mësohet se në pranga janë vënë B.K,  46 vjeç dhe T.V,  36 vjeç, të dy të lindur në Qerret dhe banues në Kavajë.

Droga në gomone është bllokuar pas një operacioni të përbashkët të Policisë Kufitare Shqiptare dhe Guardia di Finanza.

Në orët e para të mëngjesit të sotëm Salla Operative e grupit Aereo Naval të Taranto ka komunikuar që ka marrë njoftim nga Patrulla e Përbashkët GdF dhe Delta, që një mjet po lëviz drejt brigjeve italiane. 

Helikopteri i GdF në orën 06:10, ka diktuar një gomone rreth 5 metra me dy persona në bord në një distancë 28 kilometër nga grykderdhja e lumit Vjosa dhe ka konstatuar disa pako në të. 

Rreth orës 11:00 të paradites gomonia e cila po ndiqej u bllokua dhe u ndalua nga pjesëmarrësit në këtë operacion, në një distancë 32 kilometër nga grykëderdhja e lumit Vjosa.

Në gomonen e sekuestruar u gjetën 12 pako të përmasave të ndryshme dhe më pas u shoqërua drejt portit të Brindisi-t.

Gjatë këtij aksioni u kontrollua edhe një motopeshkarexhë, cila lundronte disa milje në distancë nga objektivi, ku rezultoi që në bordin e saj nuk u gjendën materiale të dyshimta.









Redaksia Online
Al.N/Shqiptarja.com