Tregtarët e Tiranës kundër rritjes
së taksave, Duma: PD i’u mbështet

Partia Demokratike do të mbështesë të gjithë tregtarët të cilët janë prekur nga rritja e taksave në Tiranë.

Ky ka qenë premtimi bërë nga Sekretarja e Marrëdhënieve me Publikun, Grida Duma gjatë takimeve që ka zhvilluar me disa tregtarë të rrugës së Barrikadave në njësinë nr 9 në Tiranë mbi vështirësitë e biznesit të vogël, taksat e rritura të Bashkisë dhe tarifat e reja që ajo ka vendosur.

Tregtarët kanë treguar se është bërë e pamundur të mbajnë hapur dyqanin dhe apelojnë për ndryshim. Shumë prej tyre ndodhen në kushtet e mbijetesës e shumë të tjerë vuajnë edhe arbitraritetin e qeverisjes.

“Na ngacmojnë e vijnë na gjobisin. Me gjobitën 500 mijë lekë para një jave kot më kot. Punojmë për copën e bukës dhe tjetri të gjobit. Më tha që të kaloi një klient pa kupton tatimor. I thashë ma sill klientin këtu. Nuk e solli dhe më vendosi gjobën. Biznesi duhet lënë të punojë. Unë dua të flas, të bëjnë çtë duan”, tha një bukëpjekëse.

“Jemi shumë keq. Po shikojmë taksat e reja që na kanë ardhur nga Bashkia. Janë të pamenaxhueshme. Nuk ka punë fare”, u shpreh një tjetër tregtare.

Tregtarët thonë se dhjetëfishimi i taksave është i papërballueshëm në kushtet ekonomike me të cilat ata përjetojnë. “Taksa nga 15 mijë do e bëjnë 150 mijë. Nga 1500 do e bëjnë 15 mijë. Eshtë 10 fishim. Nuk ia dalim dot. Do falimentojmë. Puna dihet që ka rënë dhe këtë thonë të gjithë”, tha një shitës ushqimoreje.

Të tjerë tregtarë kërkuan mbështetjen e Partisë Demokratike për të ndryshuar realitetin dhe për të vrarë frikën. “Duam përkrahjen tuaj sepse pa atë nuk bëjmë dot”, tha një tregtar dyqani. “Ne duhet të largojmë frikën. Se po të rrijmë gjithë kohës me frikë, nuk ka më kuptim pastaj. Duhet të kemi forcë”, tha një tjetër biznesmen i vogël.

Duma u shpreh se ata do të ketë mbështetjen  e plotë të Partisë Demokratike për të ndalur rritjen e taksave dhe arbitraritetit të qeverisë dhe Bashkisë së Tiranës, për ti lehtësuar e stimuluara ata që të rriten e të krijojnë vende pune.  “Do e keni 100 % mbështetjen tonë. Më shumë se ndonjëherë. Të siguroj për këtë”, tha Duma.

Redaksia Online
(F.T/shqiptarja.com)