Trump dhe Putin përballë njëri-tjetrit
në samitin e G20-ës

Presidenti amerikan, Donald Trump, do të takojë sot për herë të parë homologun Rus, Vladimir Putin. Dy liderët do të takohen në samitin e G20-ës i cili zhvillohet sot dhe nesër në Hamburg të Gjermanisë.

Sipas mediave ruse dy liderët pritet të takohen sot pasdreke për rreth një orë, ndërsa është ende e paqartë nëse do të ketë dalje për mediat pas takimit kokë më kokë.

Ndërkohë BBC thotë se ajo që dimë është se dy liderët kanë pikëpamje të ndryshme për çështjet madhore ndërkombëtare, përfshirë edhe Sirinë.

Të dy liderët kanë theksuar se dëshirojnë të takohen për të riparuar marrëdhëniet e dëmtuara nga kriza në Siri dhe Ukrainë, si dhe nga ndërhyrja e Rusisë në zgjedhjet në Amerikë.

Gjithashtu gjatë samitit pritet të diskutohet rreth ndryshimeve klimaterike dhe tregëtisë ndërkombëtare, e cila ka shkaktuar protesta masive në Gjermani.

Përplasjet në protestën “Mirë se erdhe në Ferr” lanë 76 policë të plagosur.

G20, apo grupi i 20 ekonomive më të mëdha në botë, është një samit i 19 shteteve të zhvilluara dhe në zhvillim, plus Bashkimin Europian.

Argjentina, Australia, Brazili, Kanadaja, Kina, Franca, Gjermania, India, Indonezia, Italia, Japonia, Meksika, Rusia, Arabia Saudite, Afrika e Jugut, Koreja e Jugut, Turqia, Britania e Madhe, SHBA-të dhe Bashkimi Europian marrin pjesë në samit.



Redaksia online
D.M/Shqiptarja.com