Trump e shkarkon me Twitter,
kreu i CIA zëvendëson Tillerson

Presidenti i SHBA, Donald Trump, ka shkarkuar sot nga detyra Sekretarin e Shtetit Amerikan, Rex Tillerson nëpërmjet një deklarate në Twitter. Trump e ka zëvendësuar Tillerson me shefin e CIA-s, Mike Pompeo. 65-vjeçari Rex Tilleron, ish-diplomat amerikan, mori detyrën e Sekretarit të Shtetit më 1 shkurt 2017. 

Ndërkohë, do të jetë Gina Haspel që do të marrë drejtimin e Inteligjencës Amerikane (CIA), duke u bërë kështu e para femër në krye të një organi kaq të rëndësishëm amerikan. Lajmi për shkarkimin e Tillerson është publikuar nga mediat e huaja, të cilat nuk japin detaje të tjera rreth këtij vendimi të papritur të Trump.

Ndërkohë, ka qenë dhe vetë Presidenti Donald Trump, i cili përmes një postimi në Twitter njofton ndryshimet më të fundit, ndërsa falënderon Tillerson për punën e deritanishme dhe uron ata që marrin detyrën. Ky është një ndër vendimet më të guximshme të Presidentit amerikan, i cili i beson për herë të parë Shërbimin Inteligjent një gruaje, si dhe largon një ndër Sekretarët më të afër të tij.

“Mike Pompeo, shefi i CIA-s, do të jetë Sekretari i ri i Shtetit amerikan. Ai do të bëjë një punë fantastike. Faleminderit Rex Tillerson për shërbimin e tij. Gina Haspel do të jetë shefja e re e CIA-s dhe e para grua e zgjedhur në këtë detyrë. Urime të gjithëve!”, shkruan Trump në rrjetin social Twitter.

(Postimi i Presidentit Donald Trump për ndryshimet më të fundit)

Rreth një muaj më parë, Tillerson kishte përfshirë në listën e perosnave “non-grata” të Departamentit amerikan të Shtetit që u ndalohet hyrja në Shtetet e Bashkuara, edhe ish-Prokurorin e Përgjithshëm të Shqipërisë, Adriatik Llalla dhe familjen e tij, me përjashtim të djalit të vogël të Llallës që ka lindur në SHBA.

Llalla kishte akuzuar ambasadorin amerikan në Tiranë Donald Lu për keqinformim ndaj shtetit të tij, lidhur me këtë.

Lu e kishte akuzuar Lllallën se kishte penguar reformën në drejtësi dhe kishte refuzuar të hetonte politikanët e korruptuar.

d.c./s.k/shqiptarja.com