Trump këmbëngul në ambiciet territoriale, publikon hartën ku Kanadaja është pjesë e SHBA-së

SHBA - Ideja e një zgjerimi shumë të madh territorial të Shteteve të Bashkuara vijon të promovohet në çdo rast nga Donald Trump, i cili së fundmi publikoi në rrjetet sociale një hartë që tregon të gjithë Kanadanë si pjesë e vendit të tij.

Presidenti i zgjedhur i SHBA-së e bëri këtë veprim pasi më parë bëri kërcënime ekonomike kundër Otavës në një konferencë shtypi. Në veçanti, duke folur me gazetarët dje mes tranzicionit politik pasi kryeministri Justin Trudeau njoftoi  të hënën se po jepte dorëheqjen, Trump përjashtoi dërgimin e trupave në vendin fqinj. Por ai kërcënoi se do të përdorte "fuqinë ekonomike" ndërsa shpjegoi se është në interesin e SHBA-së që ta bëjnë Kanadanë "shtetin e 51-të të saj".

“Do të ishte me të vërtetë e rëndësishme që të hiqet qafe kjo vijë e tërhequr artificialisht,” tha ai, duke iu referuar kufirit SHBA-Kanada, përpara se të detajojë ankesat e tij kundër fqinjit të madh në veri, të cilin ai e akuzon se ka përfituar pa pagesë nga mbrojtja ushtarake amerikane.

"Asnjë në një milion"

"Nuk ka asnjë shans një në një milion që Kanadaja të bëhet pjesë e Shteteve të Bashkuara," sqaroi Trudeau dje në një postim në Platformën X. "Punëtorët dhe komunitetet në të dy vendet tona përfitojnë nga të qenit një nga partnerër tregtar më të mëdhenj”.

Nga ana e saj, Ministrja e Jashtme e Kanadasë Melanie Jolie vuri në dukje në postimin e saj se "Komentet e Presidentit të zgjedhur Donald Trump tregojnë një mungesë të plotë të të kuptuarit të asaj që e bën Kanadanë një vend të fortë". “Ne kurrë nuk do të dorëzohemi para kërcënimeve”, theksoi Jolie.

Në një deklaratë të lëshuar dje nga Shtëpia e Bardhë, me një ton shumë të ndryshëm nga retorika e Trump, thuhet se presidenti amerikan në largim, Joe Biden, ka folur me Trudeau dhe ka shprehur vlerësimin e tij, pas njoftimit të liderit kanadez të hënën se do të japë dorëheqjen.

“Gjatë dekadës së fundit, Kryeministri Trudeau ka udhëhequr me vendosmëri, optimizëm dhe vizion strategjik. Aleanca SHBA-Kanada është më e fortë për shkak të tij. Si populli amerikan ashtu edhe ai kanadez janë më të sigurt për shkak të tij. Dhe bota është një vend më i mirë për shkak të tij”, shkroi Biden në deklaratën e tij.

Reagime ndaj deklaratave për Grenlandën dhe Panamanë

Duke iu referuar konferencës së djeshme për shtyp, refuzimi i Trump për të përjashtuar mundësinë e aksionit ushtarak në Kanalin e Panamasë dhe Grenlandën shkaktoi një bujë të veçantë.

Lidhur me boshtin detar shumë strategjik të Amerikës Qendrore dhe territorin e gjerë të Arktikut, Donald Trump i konsideroi të dyja si "shumë të rëndësishme për sigurinë ekonomike" të Shteteve të Bashkuara.

"Unë nuk mund t'ju siguroj për asnjërën," tha presidenti i zgjedhur në mënyrë specifike kur u pyet për përdorimin e mundshëm të forcës për të aneksuar Kanalin e Panamasë dhe Grenlandën.

“Kina është ajo që menaxhon” Kanalin e Panamasë, siguroi miliarderi 78-vjeçar republikan, i cili do të betohet më 20 janar , duke iu referuar kësaj arterie detare që i përket shtetit sovran të Panamasë.

Sa i përket Grenlandës, ai siguroi se marrja e kontrollit të saj ishte një çështje e "sigurisë kombëtare", duke përmendur lëvizjet e anijeve ruse dhe kineze dhe kërcënoi Danimarkën me tarifa "shumë të larta" doganore nëse nuk largohej nga territori autonom.

G.K/Shqiptarja.com

TAG:
• donald trump
• Justin Trudeau
• kanada
• Joe Biden
• Groenlandë
• panama