Presidenti Donald Trump ka kërcënuar të bllokojë hapjen e një ure që lidh SHBA-në dhe Kanadanë derisa Uashingtoni të “kompensohet plotësisht për gjithçka” që i ka dhënë fqinjit të tij verior.

"Ura Ndërkombëtare Gordie Howe, që lidh provincën kanadeze të Ontarios me shtetin amerikan të Miçiganit, nuk do të hapet derisa Otava "t'i trajtojë Shtetet e Bashkuara me drejtësinë dhe respektin që meritojmë", shkroi Trump në rrjetet sociale.

Ura po financohet nga qeveria kanadeze, por do të jetë në pronësi publike si të Kanadasë ashtu edhe të Miçiganit.

Nuk është e qartë se si Trump mund ta bllokojë hapjen e saj, por ai tha se negociatat do të fillojnë menjëherë, pa dhënë hollësi.

Ura, e cila shtrihet përgjatë lumit Detroit, pritet të hapet në fillim të vitit 2026. Ndërtimi filloi në vitin 2018, por projekti ka qenë një pikë mosmarrëveshjeje midis vendeve për më shumë se një dekadë.

Ura vlerësohet të ketë kushtuar 6.4 miliardë dollarë kanadezë, sipas Korporatës Kanadeze të Transmetimeve.

Në deklaratën në platformën e tij Truth Social, Trump tha se SHBA-të duhet të zotërojnë "të paktën gjysmën e këtij aseti". Ai gjithashtu sugjeroi që Kanadaja zotëronte të dyja anët e urës, atë kanadeze dhe amerikane.

“Qeveria kanadeze pret që unë, si President i Shteteve të Bashkuara, t’i lejoj ata thjesht ‘të përfitojnë nga Amerika!’Nuk do të lejoj që kjo urë të hapet derisa Shtetet e Bashkuara të kompensohen plotësisht për gjithçka që u kemi dhënë", shtoi ai.