Ora e një sulmi amerikan ndaj tokës venezueliane mund të jetë duke afruar. Presidenti Donald Trump ka shkruar në platformën e tij Truth Social se hapësira ajrore mbi dhe rreth vendit të Amerikës Latine është “e mbyllur”. “Për të gjitha kompanitë ajrore, pilotët, shpërndarësit e drogës dhe trafikantët e qenieve njerëzore, ju lutemi ta konsideroni hapësirën ajrore mbi dhe përreth Venezuelës si plotësisht të mbyllur”, deklaroi ai. Ky vendim vjen një ditë pas Ditës së Falënderimeve. Në takimin me gazetarët jashtë rezidencës së tij në Florida, Trump paralajmëroi se sulmet tokësore "do të fillojnë shumë shpejt". Disa linja ajrore të huaja kanë ndaluar tashmë fluturimet për në Venezuelë ditët e fundit. Autoriteti i Aviacionit Civil të Karakasit u përgjigj duke revokuar licencat e Iberia-s së Spanjës, TAP-it të Portugalisë, Avianca-s së Kolumbisë, LATAM-it të Kilit dhe Brazilit, Gol-it të Brazilit dhe Turkish Airlines-it të Turqisë.

Ndërkohë po rriten polemikat mbi sulmet detare, të cilat po ndodhin njëri pas tjetrit që nga gushti, me dhjetëra viktima. “Vritini të gjithë”: me këto fjalë, më 2 shtator të kaluar, sekretari amerikan i Luftës, Pete Hegseth, vendosi fatin e dy të mbijetuarve nga sulmi i një rakete amerikane kundër një anijeje midis Trinidadit dhe Venezuelës. “Urdhri ishte t’i vrisnin të gjithë”, ka zbuluar një burim për Washington Post, dhe kështu një sulm i dytë përfundoi detyrën, duke i vrarë të 11 të dyshuarit si trafikantë droge që ndodheshin në bord, përfshirë edhe të dy që deri në fund ishin kapur pas rrënijave të djegura. Hegseth e ka mohuar rindërtimin e gazetës — “fake news për të njollosur luftëtarët tanë të jashtëzakonshëm që luftojnë për të mbrojtur atdheun” — por gjatë natës ka postuar në X një mesazh të shkurtër: “Sapo kemi filluar të vrasim narkoterroristët”.

Telefonata drejtuar Maduros (dhe kërcënimet)

Edhe presidenti Donald Trump të enjten, Ditën e Falënderimeve, vlerësoi Forcat e Armatosura të Shteteve të Bashkuara, duke lënë të kuptohet se faza dy e Operacionit “Shtiza e Jugut” është gati të nisë: “Ju jeni shtylla kurrizore e fuqisë ajrore amerikane dhe javët e fundit keni punuar për të penguar trafikantët venezuelianë të drogës — tha ai në një video mesazh video. "Tani nuk duan më të dërgojnë mallin me det, dhe ne do të fillojmë t’i ndalojmë edhe në tokë”. Më pas, duke folur me gazetarët jashtë rezidencës së tij në Florida, shtoi: “Kjo do të fillojë shumë shpejt”.

Presidenti amerikan vazhdon të ecë në dy drejtime paralele: me kërcënimin e një ndërhyrjeje të afërt në territorin venezuelian, por edhe me rrugën diplomatike për një ndryshim të mundshëm regjimi në Karakas.

The New York Times ka zbuluar se javën e kaluar Trump ka folur në telefon me presidentin venezuelian Nicolás Maduro, duke diskutuar mundësinë e një takimi ballë për ballë në Shtetet e Bashkuara. Duke cituar disa burime të njohura me çështjen, gazeta shtoi se do të ishte samiti i parë mes dy liderëve.

Pak ditë pas telefonatës, e zhvilluar në praninë e Sekretarit të Shtetit Marco Rubio, Departamenti i Shtetit të hënën shpalli kartelin e narkotrafikut “Cartel de los Soles” si një organizatë të huaj terroriste, të drejtuar pikërisht nga Maduro.

Falja e ish-presidentit (i dënuar për ryshfet dhe trafik droge)

“Lufta kundër narkotrafikut” e nisur nga Trump në Amerikën Latine nuk është megjithatë pa paradokse. Dje kreu i Shtëpisë së Bardhë njoftoi se dëshiron t’i japë falje ish-presidentit të Hondurasit, Juan Orlando Hernández, i dënuar në vitin 2024 me 45 vjet burg nga një gjykatë e Manhattanit për marrjen e miliona dollarëve në ryshfet dhe drejtimin e shtetit të Amerikës Qendrore si një shtet trafiku droge, në bashkëpunim me Joaquín Guzmán, i njohur si “El Chapo”, ish-udhëheqës famëkeq i kartelit meksikan të Sinaloas.

Lajmi, i bërë publik pak orë pas informacionit për telefonatën midis Trump dhe Maduro, ka përforcuar hipotezën se edhe liderit venezuelian i është premtuar një “fund” i ngjashëm: rrëzimi dhe arrestimi, disa vite burgim në SHBA dhe pastaj liria.

Zgjedhjet në Honduras (dhe ndërhyrja e Trumpit)

Të dielën, në Honduras do të mbahen zgjedhjet presidenciale. Tre janë kandidatët në garë. Edhe këtë herë, siç ka ndodhur tashmë në zgjedhjet e fundit në Argjentinë, Trump ka kërkuar të ndikojë votën, duke i dhënë mbështetje përmes rrjeteve sociale kandidatit të Partisë Kombëtare (e djathta) dhe duke pohuar se dy kundërshtarët e tij kontrollohen nga Karakasi. “A do të marrin Maduro dhe narkoterroristët e tij kontrollin e një vendi tjetër siç kanë bërë me Kubën, Nikaraguan dhe Venezuelën?” shkroi presidenti amerikan në Social Truth. “Njeriu që qëndron në krah të Demokracisë dhe lufton kundër Maduro-s është Tito Asfura, kandidati presidencial i Partisë Kombëtare”./Corriere della sera