Trump vendos sot nëse tërhiqet
nga marrëveshja nukleare me Iranin

Presidenti amerikan pritet të tërhiqet sot nga marrëveshja nukleare me Iranin dhe të shpalosë një strategji më konfrontuese në këtë drejtim. Ky veprim nuk do të tërheqë definitivisht SHBA nga marrëveshja, por do t'i japë Kongresit 60 ditë për të vendosur nëse do ta bëjë këtë gjë, duke riimponuar sanksione.

Sekretari Amerkan i Shtetit, Rex Tillerson, është konsultuar me homologët e tij në Europë dhe Kinë, thanë zyrtarët ndërsa Trump ka qenë nën presion si nga brenda dhe jashtë vendit për të mos e braktisur marrëveshjen. Në këtë kuadër duket se shefi I shtëpisë së bardhë ka vendosur që të shpërfillë qëndrimet e aleatëve të Shteteve të Bashkuara dhe të tërhiqet nga mbështetja e marrëveshjes me Iranin për programin bërthamor të këtij të fundit.

Kongresi i kërkon Presidentit të raportojë çdo 3 muaj nëse Irani është duke respektuar marrëveshjen apo jo dhe deri më tani, Donald Trump ka dhënë dy herë “Ok” për këtë. Spekulimet se Donald Trump mund të mos e bëjë më këtë kanë shqetësuar aleatët e SHBA dhe një pjesë të vetë administratës së tij.

Vetë Sekretari i Mbrojtjes, James Mattis tha në një dëgjesë në Senat në fillim të këtij muaji se braktisja e marrëveshjes me Iranin nuk ishte në interesin e Shteteve të Bashkuara.

Sipas marrëveshjes së nënshkruar në vitin 2015 mes Iranit dhe pesë fuqive bërthamore, plus Gjermaninë, Teherani ngrin programin e tij bërthamor në shkëmbim të heqjes së pjesshme të sanksioneve.

Redaksia Online
A.J Shqiptarja.com