Turqi, Erdogan: Nëse do duhet mund
të zgjatet gjendja e jashtëzakonshme

Nëse do të jetë e nevojshme, Turqia do të zgjasë edhe me 3 muaj gjendjen e jashtëzakonshme e miratuar nga parlamenti pas dështimit të grushtit të Shtetit një javë më parë. Lajmi u konfirmua nga presidenti Erdogan. Pas ratifikimit në parlament për shpalljen e gjendjes së jashtëzakonshme zëvendës kryeministri u shpreh se shpreson që qeveria të jetë në gjendje ta revokojë vendimin pas 40 apo 45 ditësh.
 
Pasi kanë kaluar vetëm një javë pas tentativës për grusht shteti, presidenti Erdogan jep të dhëna sa i përket bilancit të viktimave dhe të të plagosurve. Në total janë 2185 persona të plagosur dhe 246 të vdekur duke përjashtuar puçistët.
 
Ndërkohë mbështetësit e presidentit vijojnë të manifestojnë nëpër rrugët e vendit duke mbajtur postera ku shkruhet “flamuri ynë, vendi ynë”. Shumë prej manifestuesve vijojnë të akuzojnë imamin Gulen si organizator të grushtit të Shtetit.
 
“Data 15 korrik e vitit që vjen do të shpallet dita e përkujtimit të martirëve që morën pjesë në tentativën e grushtit të Shtetit”, konfirmoi Erdogan në një dalje për mediat. “Brezat e ardhshëm nuk do të harrojnë kurrë heronjtë e demokracisë” shtoi ai duke përsëritur nevojën që njerëzit të dalin nëpër sheshe duke e konsideruar një mbrojtje të demokracisë.

Redaksia Online
Al.N.Shqipatrja.com