Turqi, pas tentativës për
grusht shteti, mbyllen 84 media 

Nuk ndalen spastrimet e qeverisë turke ndaj mediave në Turqi. Autoritetet në Ankara kanë urdhëruar mbylljen e 45 gazetave, 16 televizioneve dhe 23 radio.

Një ditë më parë qeveria kishte lëshuar urdhërarreste për 47 ish-gazetarë drejtues të gazetës ''Zaman'' duke u cilësuar si mbështetës të Fetullah Gylen i cili akuzihet si organizatori i puçit të Shtetit.

Mbyllja e medieve dhe shkarkimi i anëtarëve të tjerë të FA-ve u njoftuan përmes gazetës qeveritare në Turqi, “Resmi Gazete”. Emrat e organizatave mediatike ende nuk janë bërë të ditura zyrtarisht.

E ndërsa vijon gjuetia ndaj mbështetësve të Gylenit deri më tani mësohet se rreth 1700 anëtarë të tjerë të forcave të armatosura përfshirë 149 gjeneralë dhe admiral janë pezulluar nga detura.

Mes të shkarkuarve nga Forcat e Armatosura janë 87 gjeneralë ushtrie, 30 gjeneralë të Forcave Ajrore, si dhe 32 admiralë. Ushtria turke bëri të ditur gjithashtu se 8.651, apo rreth 1.5% e Forcave të Armatosura të kombit turk morën pjesë në grushtin e dështuar të shtetit. Sipas saj, komplotuesit morën në zotërim 35 avionë, 37 helikopterë, 74 tanke dhe 3 anije.

Nga ngjarja e 15 korrikut të paktën 246 njerëz humbën jetën, ndërsa më shumë se 2.000 të tjerë u plagosën. Ndërkohë parlamenti turk votoi unanimisht për krijimin e një komisioni special i cili do të hetojë tentativën për grusht shteti.

Redaksia Online
XH.K/shqiptarja.com