Turqia lëshon urdhër arresti
për të gjithë ushtarët puçistë

Pa kaluar 24 orë nga tentativa për grusht shteti në Turqi, prokuroria e Stambollit ka reaguar fuqishëm ndaj personave ushtarakë të përfshirë. Pas njoftimit të Forcave të Armatosura Turke se morën në kontroll drejtimin e vendit, Kryeprokurori i Kyçykçekmexhe-së në Stamboll lëshoi një urdhër arresti për ushtarët që u bënë pjesë e tentativës për “Grusht Shteti”. Kryeprokurori Ali Doğan, në shkresën dërguar Drejtorisë së Policisë së Stambollit, filloi zyrtarisht hetimet bazuar në nenet 309, 311,312 dhe 313 të Kodit Penal të Republikës së Turqisë.

Shkresa e Kryeprokurorit dërguar Drejtorisë së Policisë së Stambollit thotë: “Më datë 15/07/2016, rreth orës 23:00 bazuar në lajmet e përcjella në media, u informuam se disa individë ushtarakë kanë marre peng urën e Bosforit, urën Fatih Sulltan Mehmet, kanë tentuar të futen në ndërtesën e Shtabit të Përgjithshëm në Ankara, kanë rrethuar Drejtorinë e Policisë së Stambollit dhe se, në këtë mënyrë kanë tentuar të organizojnë një “Grusht Shteti” duke tentuar të rrëzojnë Shtetin e republikës së Turqisë, Qeverinë dhe rendin kushtetues.

Për personat në fjalë kanë nisur zyrtarisht hetimet bazuar në nenin 309 (Shkelja e Kushtetutës), 311 (Tentativë për të penguar Ekzekutivin), 312 (Revoltë ndaj qeverisë),313 (Kryengritje e armatosur ndaj qeverisë)të kodit Penal në Republikën e Turqisë.   Për këto arsye, është marrë vendimi për arrestimin e të gjithë personave të përmendur dhe vënia e tyre në dispozicion të Prokurorisë. Lutemi për ndjekjen e nevojshme”.
 
 
Redaksia online
a.n shqiptarja.com