Të gatuajmë me Zonjën Vjollca/Kunguj role me mish të grirë dhe Bollgur me patëllxhanë e kos

Përbërësit:

700 gr kunguj

700 gr domate mix

3 lugë gjelle vaj ulliri

1 limon

Sherebel

2 lugë gjelle peksimadhe

400 gr mish i grirë

2 qepë të vogla

1 fetë bukë e ftohtë

1 thelp hudhër

1 lugë gjelle kaperi

1 vezë

1/2 tufë majdanoz

40 gr domate të thara

1 lugë gjelle pure domate

Kripë dhe piper

Përgatitja:

Lajmë dhe pastrojmë kungujt dhe presim pjesët anësore të tij, e më pas i presim kungujt në feta me trashësi 2-3 mm.

Vendosim një tenxhere me ujë të valuar në zjarr dhe vendosim fetat e kungullit për 30 sekonda ose maksimalisht 1 minutë në ujë të valuar. I largojmë, i shpëlajmë dhe i lëmë mënjanë.

Domatet qershi i presim në gjysma , ndërsa domatet e tjera i pastrojmë nga lëkura dhe i presim në kubikë të vegjël.

Përgatisim brumin e qofteve. Në një tas vendosim mishin e grirë, qepët e grira hollë, një fetë bukë të zbutur në ujë dhe të thërrmuar, një lugë gjelle pure domate, kripë dhe piper të zi dhe i përziejmë së bashku. Shtojmë vezën, domatet e thara të prera imët , hudhër, kaperi, majdanoz dhe i përziejmë sërish.

Lyejmë një tepsi me vaj, hedhim në të domatet e prerë në kubikë dhe domatet qershi dhe i vendosim në furrë në temperaturën 200ºC për 5-10 minuta.

Vendosim në dërrasën e punës 2 ose 3 feta kungull(varet nga trashësia e tij). Në fillim të fetave vendosim 1 lugë gjelle brum qofte, i rrotullojmë dhe më pas vendosim rolenë në tavën ku kemi shtuar domatet. Gjithmonë mbyllja e rolesë vendoset poshtë. Kështu vazhdojmë deri sat ë mbushet tava.

Vendosim tavën në furrë në temperaturën 200ºC për 35 minuta. Në 10 minutat e fundit spërkatim me peksimadhe dhe lëkurë limoni vetëm pjesët e kungullit. E lëmë në furrë për 10 minuta e më pas e shërbejmë.

Receta e dytë: Bollgur me patëllxhanë dhe kos

Përbërësit:

200 gr bollgur

4 qepë të kuqe

800 gr patëllxhanë

1 tufë majdanoz

50 gr rrush të thatë

200 ml lëng perimesh

150-200 gr kos

2 lugë gjelle vaj ulliri

2 lugë gjelle uthull

1 lugë kafe kanellë

1 lugë kafe shafran

1 lugë çaji piper i kuq

Përgatitja:

Fillimisht pastrojmë patëllxhanët , i presim në kubikë 1 cm dhe i vendosim në ujë me kripë për 15-20 minuta.

Ndërkohë presim qepët në fije dhe i vendosim ato në tigan pa yndyrë me pak kripë. I mbulojmë me kapak dhe i lëmë sa të zbuten, më pas shtojmë vajin dhe i kaurdisim ato mirë duke shtuar stafidhet. I trazojmë sa të nxehen pak dhe i shuajmë me lëngun e perimeve. Në një tenxhere me 200 ml ujë të valuar shtojmë bollgurin dhe ulim temperaturën në minimum. Shtojmë pak kripë dhe e lëmë bollgurin të mbuluar për 10 minuta.

Largojmë patëllxhanët nga uji me kripë dhe i thajmë me letër kuzhine. Ngrohim 2 lugë gjelle vaj dhe kaurdisim patëllxhanët deri sat ë zbuten pak. Shtojmë patëllxhanët tek qepa me stafidhet dhe i trazojmë sëbashku me pak kanellë, spec të kuq shafran ,1/3 gotë ujë dhe e lëmë të ziejë për 5 minuta. Shtojmë 2 lugë gjelle uthull , ulim temperaturën dhe i lëmë të ziejnë pak.

Shtojmë bollgurin në tiganin me patëllxhanë dhe i përziejmë shumë ngadalë që i gjithë bollguri të përzihet mirë dhe të ndryshojë ngjyrë.

Vendosim bollgurin në një pjatancë dhe e spërkatim me pak majdanoz. E shërbejmë me kos.

Ju bëftë mirë !

/b.ha./Shqiptarja.com

TAG:
• rreze dielli
• zonja vjollca
• kungull role
• bollgur