Protesta e dhunshme e Berishës/ Koçiu: Barbare, synimi të lëndonin policët! Braçe: Përpjekje për të vrarë shërbyesit e shtetit

Rikthim te trazirat e 1997-ës e konsideroi deputeti i PS, Erion Malaj dhunën në protestën e Berishës. Në një postim në rrjetet sociale, Malaj u thotë kundërshtarëve politikë se trupëruan edhe njëherë opozitarizmin.

“Dhuna juaj nuk është protestë. Është rikthim te 1997 dhe çdo faqe të errët të historisë sonë demokratike që ju keni shkaktuar! Rrezikuat jetën e policëve dhe turpëruat edhe një herë opozitarizmin. Shqiptarët ju njohin, ju kujtojnë dhe ju kanë ndëshkuar me votë. TURP”, shkroi ai.

Taulant Balla ka ndarë një mesazh solidariteti në drejtim të punonjësve të Policisë. 16 prej tyre janë lënduar gjatë protestës së Partisë Demokratike duke marrë lëndime e djegie. Kreu i grupit parlamentar të PS ka dënuar dhunën kundrejt tyre.

“Solidaritet me punonjësit e Policisë së Shtetit. Kush ngre dorë kundër punonjësit të policisë, ka ngritur dorë kundër shtetit!”, shkruan Balla.

Policët po trajtohen në QSUT dhe në Spitalin e Traumës.

16 efektivë janë lënduar gjatë protestës së sotme të PD. Ministrja e Brendshme Albana Koçiu, e cila shkoi në QSUT, tha se dhuna ishte barbare. Koçiu u shpreh se qëllimi i vetëm i kësaj proteste ishte goditja e efektivëve.

"Kam kërkuar që të vendosën para përgjegjësisë të gjitha ata që sot u bënë pjesë e një dhune barbare. Qëllimi i vetëm i protestës së sotme ishte goditja e punonjësve të Policisë së Shtetit. Sot kam informacione që edhe gazetarë kanë pësuar lëndime në emër të dhunës që ushtrohet në protesta. Protestat janë detyrime kushtetuese për t’u zbatuar në mënyrë paqësore. Ligjet, institucionet dhe njerëzit që zbatojnë ligjin duhet të respektohen. Janë 16 efektivë që po marrin trajtim në dy strukturat spitalore më të rëndësishme, por presim nga momenti në momenti në moment të kemi referime të tjera. Janë 16 punonjës që janë dëmtuar, kanë pësuar djegie të konsiderueshme. Uroj shërim të shpejtë!", tha Koçiu.

Deputeti i Partisë Socialiste, Erion Braçe, ka dënuar ashpër dhunën në protestën e thirrur nga kryedemokrati Sali Berisha.

Përmes një postimi në rrjetet sociale, Braçe e ka konsideruar protestën e sotme si një përpjekje të militantëve për të vrarë efektivët e Policisë së Shtetit.

Duke kërkuar që ‘kjo përpjekje për të vrarë’ të mos falet, Braçe ka shtuar se ky model protestash nuk është më i mbrojtur nga ligji.

Postimi i Braçës:

TIRANA SOT, OBORRI I KUVENDIT TE REPUBLIKES;

KJO NUK ESHTE ME PROTESTE-E GARANTUAR DHE E MBROJTUR NGA LIGJI;

KETA NUK JANE ME PROTESTUES-NE TE DREJTEN E TYRE DHE TE MBROJTUR NGA LIGJI;

KJO ESHTE PERPJEKJE PER TE VRARE SHERBYES TE SHTETIT-POLICE TE SHTETIT NE DETYRE!

SHIHINI PAMJET! ME PROVE SE KAQ NUK KA!

NESE POLICIA DHE DREJTESIA E FAL KETE PERPJEKJE PER TE VRARE-sic eshte toleruar cdo here ne 12 VITE,

ATEHERE KJO ESHTE TRADHETI SHUME E MADHE NDAJ ATYRE BURRAVE E GRAVE TE NDERSHEM QE PO MBROJNE SHTETIN, SHTETIN E SHQIPTAREVE, AS TE PARTIVE E AS TE POLITIKANEVE!!

Kreu i Grupit Parlamentar të Partisë Socialiste, Taulant Balla, ka komentuar dhunën në protestën e thirrur nga Sali Berisha, duke shkruar se ajo nuk ndodh rastësisht në një ditë kur udhëheqësit e Kosovës përballen me akuza të trilluara në Hagë.

Përmes një postimi në rrjetet sociale, Balla thotë se të njëjtën gjë Berisha ka bërë edhe në shkurt të vitit 1999, kur udhëheqësit e Kosovës firmosën Marrëveshjen e Rambujesë.

Sipas Ballës, si sot, edhe atëherë Berisha sulmoi institucionet e Shqipërisë, për të devijuar vëmendjen ndërkombëtare nga ajo që po ndodhte me Rambujenë.

“A është rastësi që si në Shkurt 1999 kur udhëheqësit e Kosovës firmosnin Marrëveshjen e Rambujesë, ashtu edhe në Shkurt 2026 kur udhëheqësit e Kosovës përballen e akuza të trilluara në Hagë, Sali Berisha sulmon institucionet e shtetit shqiptar?!”, ka shkruar Balla në postimin e tij.

Toni Gogu ka ndarë një reagim për protestën e dhunshme të PD, të mbushur me molotovë duke thënë se kjo nuk është rruga përpara. Ministri i Shtetit për Marrëdhëniet me Parlamentin thotë se ky është një largim nga protesta qytetare dhe paqësore, pasi “kilometri i fundit” drejt BE-së nuk bëhetr me “megafon, molotovë e spektakël.”

“Kilometri i fundit” – dy rrugë, dy botë

Opozita bërtet për “kilometrin e fundit”.

Dhe pastaj e shndërron protestën në skenë dhune: molotovë, fishekzjarre, tym, si të ishte kjo “rruga” përpara.

Tërhiqen zvarrë nga ustallarët e dhunës, dhe largohen gjithmonë e më shumë nga protesta qytetare dhe paqësore.

Ndërsa “kilometri i fundit” i Shqipërisë drejt BE-së nuk bëhet me megafon, molotovë e spektakël.

Përshkohet nga fermeri që respekton normat, nga punëtori që punon ditë e natë, nga mësuesi që formon qytetarë, nga infermieri dhe mjeku që mbajnë sistemin gjallë, nga nëpunësi që zbaton ligjin.

Ata le të shpallin “fitoren” e radhës për kamerat.

Shqipëria le të ecë përpara me mund, me djersë dhe me rezultate, deri te mbyllja e kapitujve.

“Kilometri i fundit” nuk është spektakël.

Është punë.

Dhe destinacioni quhet Europë”, shkruan Gogu.

Kreu i Grupit Parlamentar të Partisë Socialiste, Taulant Balla

Kreu i Grupit Parlamentar të Partisë Socialiste, Taulant Balla dënoi sot sulmet e dhunshme ndaj institucioneve dhe punonjësve të policisë gjatë protestave të Sali Berishës, duke thënë se ato po përdoren për të fshehur dështimin e opozitës.

Duke shoqëruar postimin e tij me një video që tregon pjesëmarrjen e tkurrur në protestën e Berishës, ai theksoi se liria për të protestuar është e garantuar në Shqipëri, por nënvizoi se dhuna ndaj forcave të rendit nuk mund të justifikohet

Sipas tij, Policia e Shtetit mban një barrë të rëndë në ruajtjen e rendit dhe përballet çdo ditë me situata të rrezikshme. Deputeti socialist shtoi se drejtësia duhet të veprojë dhe të bëjë shembull ata që godasin punonjësit e policisë.

“Dy fjalë për fundin e protestave të bufit, ku sulmohen punonjësit e policisë dhe institucionet. Ndoshta për të fshehur me tym e flakë dështimin e tyre. Gjithmonë do të ekzistojë liria për të protestuar në Shqipërinë tonë. Por sa kohë ligji e thotë qartësisht, nuk duhet të ekzistojë liria për të goditur apo keqtrajtuar ata që kanë zgjedhur për të shërbyer në mbrojtje të sigurisë së qytetarëve. Duhet t’i mbrojmë ata që na mbrojnë dhe duhet të kujdesenm për ata që kujdesen për sigurinë e qytetarëve. kjo është ajo që bën një shtet i drejtë dhe normal. Rëndësia e detyrës që mbart uniforma e Policisë, duhet ta bëjnë shoqërinë të reflektojë, ndërsa drejtësia t’i bëjë shembull ata që godasin punonjësit e policisë. Policia i ka shërbyer dhe i shërben me devotshmëri atdheut dhe qytetarëve, përplaset çdo ditë me kriminelë e keqbërës. Policia ka derdhur gjak, në emër të misionit dhe betimit të saj. Gjaku i policisë është gjaku i shtetit. Kush ngre dorë kundër punonjësit të policisë, ka ngritur dorë kundër shtetit” shkruajti Balla në Facebook.

Postimi i Taulant Ballës në Facebook