ITALI- Dy policë, Pierluigi Rotta dhe Matteo De Menego, të dy 30 vjeç, humbën jetën këtë pasdite në Trieste gjatë një shkëmbimi zjarri me dy hajdutë. Të shtënat ndodhën pak para orës 17:00 në Selinë e Policisë në Trieste. Sipas autoriteteve policore, dy vëllezërit ishin shoqëruar në Selinë e Policisë pas një kontrolli për grabitjen e një skuteri, kryer në orët e para të mëngjesit.
Referuar mediave italiane, njëri prej dy të arrestuarve kërkoi të shkonte në tualet dhe arriti t'i vidhte armën njërit prej agjentëve. Në përpjekje për t'u arratisur, ai qëlloi një polic në ambientet e brendshme të Komisariatit. 39-vjeçari ia doli që përmes një kalimi nëntokësor të dilte jashtë, ku dhe qëlloi edhe efektivin e dytë duke e lënë të vdekur.
Dëshmitarët nga vendi i ngjarjes tregojnë se janë dëgjuar shumë të shtëna me armë, duke shkaktuar panik në rrugë. Rruga përballë komisariatit u rrethua nga kordoni i policisë. Një prej tyre tregon se i riu nga Republika Domenikane, me armë në dorë kishte tentuar që të vidhte një makinë policie për t'u arratisur, por nuk ia doli duke u vënë në prangat e policisë.
Presidenti i Republikës Sergio Mattarella shprehu "trishtim të thellë për vdekjen e dy agjentëve", e ndërsa Kryetari i Komunës së Trieste, Roberto Dipiazza, shpalli ditë zie për qytetin.
