U kapën duke transportuar 19 emigrantë të paligjshëm, arrestohen 3 persona! Njëri prej tyre tentoi t'i largohej policisë

Në kuadër të operacionit ‘Perimetri’ policia e Korçës ka vënë në pranga 3 persona pasi u kapën duke transportuar emigrantë të paligjshëm, ndërkohë që njëri prej të cilëve nuk iu bind urdhrit të Policisë për të ndaluar.

Policia njofton se shtetasi Denis Myrtaj, është konstatuar nga shërbimet e Policisë, në aksin rrugor Bilisht-Korçë, pranë fshatit Cangonj, duke transportuar kundrejt shpërblimit me mjetin tip “Toyota”, 9 emigrantë të paligjshëm, të cilit gjatë ndjekjes i është bërë me shenjë të ndalonte, por 38-vjeçari, nuk i është bindur urdhrit të punonjësve të Policisë për të ndaluar, ku më pas u kap dhe neutralizua.

Ndërsa shtetasit Gentian Mërturi dhe Arben Rapi, u kapën në lagjen nr. 1, Pogradec, duke transportuar me mjetin tip “Benz”, 10 emigrantë të paligjshëm të cilëve kundrejt fitimit prej 1300 euro në total, iu kishin premtuar kalimin drejt vendeve të BE-së.

Materialet në ngarkim të tyre i kaluan Prokurorive të Rretheve Gjyqësore Korçë e Pogradec, për veprat penale “Ndihma për kalim të paligjshëm të kufijve”, kryer në bashkëpunim dhe “Mosbindja ndaj urdhrit të punonjësit të policisë së rendit publik”.

M.Q./Shqiptarja.com

TAG:
• Korce
• pogradec
• emigrante te paligjshem