UNHCR: Refugjatët të zhvendosen
sa më shpejt nga ishujt grek

UNHCR ka reaguar për kushtet e vështira të jetesës që janë duke u përballur refugjatët në ishujt grek, duke u shprehur se ata duhet të zhvendosen sa më parë nga ishujt drejt tokës greke.

“Ritmi i ngadaltë i regjistrimit ose identifikimi të personave në nevojë dhe mungesa e mëparshme e  ambienteve të përshtatshme për të strehuar refugjatët, ka bërë që procesi i transferimit të tyre të ngadalësohet”,  është shprehur Adrian Edwards, zëdhënës i UNHCR-së.

Edwards ka shtuar se zhvendosja nga ishujt drejt tokës e refugjatëve duhet të përshpejtohet, pasi edhe parashikimi i motit për ditët në vazhdim mbetet shqetësues, pasi temperaturat do të bie në mënyrë të konsiderueshme.

“Momentalisht në ishullin e Samos, vetëm disa kilometra larg nga brigjet e Turqis, 700 njerëz, janë duke jetuar në tenda, pa ngrohje”, tha Edwards.

Ndërkohë  Organizata Ndërkombëtare e Migrimit, ka deklaruar se gjatë vitit 2016, ka rënë me 18 përqind numri i emigrantëve të cilët kanë  kaluar nga Greqia përmes rrugëve detare.

Redaksia Online
D.T/Shqiptarja.com