Universitetet publike, skadon
sot mandati i drejtuesve

TIRANE-Afati katër-vjeçar i drejtuesve të universiteteve publike në vend skadon sot. Megjithatë ministria e Arsimit dhe Shkencës nuk ka përcaktuar ende një datë se kur do të mbahen zgjedhjet për drejtuesit e rinj dhe kur do të hapet fushata zgjedhore. Gjë që pritet që në të vërtetë të detajohet brenda kësaj jave. Por pavarësisht këtij fakti në universitetin e Tiranës, beteja për të mbajtur sërish të njëjtin post apo për ta fituar atë për herë të parë, ka nisur prej ditësh. Beteja më e fortë pritet të jetë te fakulteti i Mjekësisë, ku deri më tani janë zyrtarizuar kandidaturat e kancelarit Bajram Hysa si dhe drejtorit të politikave në ministrinë e Shëndetësisë, Pëllumb Pipero, ndërsa flitet se do të rikandidojë edhe dekani aktual, Alfred Priftanji, shefi i nefrologjisë Nestor Thereska si dhe zëvendësrektorja Elsa Kone. Te Filologjiku Shezai Rrokaj do të ketë përballë Valentina Dukën, te Gjuhët e Huaja, Klodeta Dibra do të përballet me Nonda Vorfin, te shkencat e Natyrës dekani aktual Ilirian Manollari do të ketë përballë Mynir Konen, ndërsa te Ekonomiku dhe Shkencat Sociale deri tani janë bërë publike vetëm emrat e dy dekanëve aktualë të cilët do të kërkojnë një mandat të dytë, përkatësisht Omer Stringa dhe Theodhori Karaj.

Sa i përket Garës për rektor, është konfirmuar se Dhori Kule do të kërkojë një mandat të dytë 4-vjeçar dhe përballë tij do të jetë dhe dekani i Shkencave të Natyrës, Ilirian Manollari. Zgjedhjet në universitete do të përfshijnë të gjitha hallkat drejtuese të arsimit të lartë duke filluar nga dekan, shefat e departamenteve, stafet studentore, çka për pasojë do të sjellin një ndryshim rrënjësor të të gjitha proceseve që ndodhin brenda dyerve të një universiteti.
(sg/shqiptarja.com)