Urdhër arresti për Kumbaron,
nuk u paraqit në gjykatë angleze

Ish-funksionari i shërbimit sekret shqiptar, Ilir Kumbaro, ndaj të cilit drejtësia shqiptare ka kërkuar ekstradimin, nuk është paraqitur gjate seancës gjyqësore në ngarkim të tij. Policia angleze ka filluar menjëherë hetimet për gjetjen dhe arrestimin e tij.

Televizioni Top Channel bëri të ditur se prokurorja e cështjes, e cila është përfaqësuese e palës shqiptare në këtë gjykatë është shprehur se Kumbaro kishte hyrë ilegalisht në Britaninë e Madhe dhe se kishte mundësitë dhe mjetet në dispozicion për tu zhdukur dhe për t'iu shmangur drejtësisë.

Avokati i Kumbaros është shprehur se kishte kontaktuar me familjen por nuk saktësoi nëse ishte kontaktuar apo jo klienti i tij.

Urdhri i arrestit është lëshuar nga drejtësia ndërsa pritet që policia britanike të bëjë ndalimin e tij, i cili pas arrestimit do të procedohet në gjendje arresti, deri në pritje të vendimit përfundimtar.

Kumbaro akuzohet për zhdukjen e biznesmenit shqiptaro-maqedonas, Remzi Hoxha, në vitin 1995. Atij i është dhënë leje qëndrimi për në Britani që nga gushti i vitit 1996, pas pretendimeve të tij se ai ishte refugjat kosovar, duke u paraqitur me emrin e rremë ,Shaqa Shatri.