Urdhri i Mjekut: Reformë totale në
mjekësi, absurde të mos kemi as ujë

TIRANE - Kreu i “Urdhrit të Mjekut” të Shqipërisë, Dine Abazaj, thotë se sistemi ynë shëndetësor ka nevojë për një reformë totale, duke filluar nga uji që mungon e deri tek ulja e besimit që pacientët kanë të mjekët. Sipas tij, këto gjëra duhet të ndryshojnë dhe mjekësia të fillojë të ecë në një rrugë të mbarë dhe të sigurtë.

"Në spitale ka mungesa të jashtëzakonshme. Duke filluar që nga uji, nga ngrohja, nga ushqimi, nga të tëra për të cilat është folur jashtëzakonisht shumë shpesh. Problem tjetër janë edhe mungesa e ilaçeve në spitale. Shpesh herë shikojmë njerëz duke blerë ilaçe në farmacitë jashtë spitalit. Ministri i Shëndetësisë duhet ta dijë si ka ndodhur edhe si duhet të rregullohet kjo gjë. Një problem shqetësues është edhe ai i analizave që nuk bëhën në spital por bëhen në spitale private për arsye se nuk janë kushtet e duhura në spitalet tona shtetërore.

Rëndësi ka edhe shërbimi ambulator që lë shumë për të dëshiruar"- ka deklaruar Dine Abazaj. Sipas tij edhe ankesat e pacientëve ndaj mjekëve për gabime mjekësore, apo trajtim të gabuar me medikamente kanë ardhur në rritje.

"Pakënaqësia është goxha e madhe çka do të thotë se sistemi shëndetësor ka shumë mangësira. Ka një krizë besimi të shërbimit shëndetësor dhe ndaj bluzave të bardha. Në qoftë se kjo krizë besimi minimizohet apo rritet kënaqësia e shërbimit shëndetësor do të thotë se shërbimi i mjeksisë ndaj pacientëve ka hyrë në rrugën e mbarë për ndryshe në qoftë se kjo krizë besimi vazhdon, do të thotë se shërbimi shëndetësor ka shumë mangësira" – shpjegon Abazaj.

Ai tërheq vëmendjense duhet kompletuar edhe shërbimi ambulator që pacientët  të mos detyrohen të shkojnë në klinikat private apo në QSUT për ta ndjekur sëmundjen e tyre, por në ambulancat e lagjes.

Ky shkrim u botua sot në Shqiptarja.com, versioni print, dt.10.08.2013
Redaksia online
(ar.sh/shqiptarja.com)