Pas më tepër se një muaji, mjekët pediatër pohojnë se ka një interes të shtuar për vaksinimin e adoleshentëve +16 vjeç ku mesatarisht në një qendër shëndetësore kryhen 2-3 vaksinime në ditë për këtë kategori. Por shqetësuese është refuzimi i vaksinës tek fëmijët +12 vjeç me probleme të sistemit imunitar.
“Është rritur interesimi nga ana e prindërve sigurisht, është rritur dhe vaksinimi. Kemi vaksinim 16+ flas gjithmonë, me mesatare 70-80 vaksinime në total. Jemi ende në dozën e parë që është aplikuar te shumica e pacientëve duke qenë se tani është rritur edhe interesimi”, u shpreh pediatrja.
Pediatrja Iris Mali thotë se ka ende shumë prindër skeptikë, për shkak të informacioneve të shumta jo zyrtare dhe teorive konspirative.
“Janë skeptik për ato që ne i quajmë efekte anësore dhe popullsia i quan gjëra jo të dëshiruara le ta themi sepse duke qenë se dhe informacioni është goxha i madh që marrin qoftë i vërtet qoftë i pavërtetë i bën që të jenë skeptik”, tha Mali.
Në një intervistë për Report Tv, mjekja rekomandon vaksinimin ndaj COVID të të gjithë fëmijëve me sëmundje kronike.
“Është e mira që të vaksinohen sidomos dhe në këtë periudhë që jemi në periudhën e dimrit ku është e shtuar dhe sëmundshmëria akute le ta themi dhe COVID normalisht është prezent, është e mira të vaksinohen”, vijoi ajo.
Në qendrat shëndetësore por edhe në Urgjencën e Pediatrisë, është vërejtur një fluks i shtuar i fëmijëve për shkak të virozave të stinës. Nuk mungojnë as rastet me COVID, por sipas mjekëve janë në shifra të ulëta.
