Vasili “shpërthen” ndaj Ramës:
Po shkreton ekonominë, i paaftë

Kreu i Grupit Parlamentar të LSI, Petrit Vasili, ka vijuar sulmet ndaj kryeministrit Edi Rama, duke u ndalur këtë të diel tek ekonomia.

Në faqen e tij në “Facebook”, Vasili shkruan se paratë po ikin, ekonomia po rrënohet dhe shkollëpaku argaliset me call center.

Sipas tij, biznesi shqiptar po përjeton ditë shumë të vështira dhe se dërdëllitjet televizive të kryeministrit të paditur janë lajthitjet e një mendjeje boshe dhe të paaftë.

“Paratë po ikin, ekonomia po rrënohet dhe shkollëpaku argaliset me call center. Banka e Shqipërisë raporton se bankat shqiptare po kreditojnë masivisht jo bizneset në Shqipëri, por bizneset në Kosovë, Maqedoni, Turqi dhe jo pak, por plot 505 milionë euro. Këta tregues po rriten vit pas viti. Biznesi shqiptar po përjeton ditë shumë të vështira.
Dërdëllitjet televizive të kryeministrit të paditur në kotecin e tij televiziv për call-center për biznesin janë lajthitjet e një mendjeje boshe dhe të paaftë, qe po e çon vendin drejt një humnere ekonomike, që prodhon vetëm varfëri të thellë, polarizim të frikshëm shoqëror, deprimim dhe rrënim pa kthim.
Dikush duhet t'ia shpjegojë këtij kryeministri të paditur, që qesh pa vetëdije, se paratë e drogës dhe krimi që janë ulur këmbëkryq ngado, po e shkretojnë ekonominë e Shqipërisë dhe po i bëjnë edhe investitorët vendas, e jo më ata të huaj, që të ikin nga sytë këmbët.
Shqipëria ka nevojë klithëse për model ekonomik dhe për një pakt kombëtar për ekonominë, që të ngjallë besim e siguri, që ta bëjë biznesin të kthejë sërish sytë nga Shqipëria. Këtë mund ta bëjnë vetëm profesionistët dhe jo shkollëpaku”, shkruan Vasili.
 
Redaksia Online
D.Ç./Shqiptarja.com