Vdekshmëria foshnjore
Shqipëria, vendi më i keq

TIRANE- Vdekshmëria foshnjore në vendin tonë është më e lartë në rajon si dhe disa herë më i lartë se limiti i vendosur nga BE. Në Shqipëri vdesin 16 foshnja për 1000 fëmijë të lindur të gjallë. Ndërkohë që në Greqi ky raport është vetëm 3 vdekje për 1.000 lindje të gjalla. Ndërkohë që shifrat janë edhe më alarmante po të krahasosh zonat. Kështu sipas raportit Kombëtar të Objektivave të Zhvillimit të Mijëvjeçarit, në qytet kemi 12 vdekje për 1.000 lindje, në fshat ky numër është 24 vdekje për 1.000 lindje, ndërsa në zonat malore kemi një trefishim të fenomenit, plot 38 vdekje për 1.000 lindje të gjalla. Ndërkohë që raporti Kombëtar i OZHM-së për vitin 2010, sjell të dhëna edhe për vdekshmërinë e foshnjave nga 0-5 vjeç, që nuk janë të dhëna optimiste. Kështu në qytet këto vdekje janë 13 fëmijë për 1.000, në fshat kjo shifër është 28 të vegjël që humbasin jetën deri në moshën 5 vjeç, ndërsa në zonat malore janë plot 42 foshnja të kësaj grupmoshe që humbasin jetën për shkaqe të ndryshme për 1.000 fëmijë të kësaj moshe. Ndërkohë që ekspertët që janë marrë me analizimin e shkaqeve, vihet theksi se në fshatra kujdesi shëndetësor lë për të dëshiruar, shumë qendra shëndetësore nuk kanë kushtet bazë të pajisjeve dhe higjienës dhe të tjera nuk kanë madje as ujë. Raporti shton se sistemi shëndetësor duhet të jetë falas, por në të vërtetë korrupsioni është i kudondodhur.