Veliaj-Kuvendit: Na jepni dorë të lirë
të shkarkojmë nëpunësit pa shkollë

TIRANË - Kryebashkiaku Erion Veliaj i ka kërkuar parlamentit të krijojë mundësitë ligjore që të ketë dorë të lirë në emërimet dhe shkarkimet në radhët e administratës bashkiake. Sipas tij pengesë është bërë ligji i Nëpunësit Civil, nën mbrojtjen e të cilit sipas Veliajt, janë një seri militantësh të pakualifikuar dhe që nuk mund të shkarkohen pa pasur penalitete financiare.

"Kemi administratë të tejfryrë me militantë që kanë shkollim, totalisht të pakualifikuar. Nuk ndërhyjmë dot për shkak të ligjit të Nëpunësit Civil. Na jepni dorë të lirë tek emërimet dhe shkarkimet në administratë. Se në fund qytetarët i kërkojnë llogari qytetarëve", u shpreh Veliaj.

Deputeti i Partisë Socialiste Bashkim Fino i kërkoi kryetarit të bashkisë të paraqesë amendamente në kuvend.

...
Reforma territoriale e miratuar në korrik të 2014-ës lë ende paqartësi në mënyrën se si do të ndahen kompetencat mes pushtetit vendor dhe qendror. Kryetari i Bashkisë së Tiranës Erion Veliaj i kërkoi qeverisë që të miratojë aktet nënligjore që plotësojnë projektligjin e autonomisë vendore për të saktësuar kompetencat.
 
Kryebashkiaku raportoi për projektligjin e autonomisë vendore në Komisionin kuvendor të Ligjeve, ku të ftuar ishin edhe organizata civile dhe përfaqësues të pushtetit vendor, ndërsa opozita nuk ishte e pranishme në sallë.
 
Qytetari i parë i Tiranës i cili më herët ka kritikuar si të padrejtë ndarjen e buxhetit për bashkitë e vendit, tha se duhet një garë kompetitive mes bashkive ku në sajë të projekteve e performancave të tyre të ndahen edhe fondet nga qeverisja qendrore.
 
Sipas këtij projektligji kryebashkiakëve i shtohen17 kompetenca të reja.
 
Emergjencat Civile që bashkia merr nën kompetencë, sipas kryebashkiakut Veliaj kanë nevojë për më shumë fonde.  "Gjatë përmbytjeve morëm de fakto kompetencat e zjarrfikësve", - u shpreh Veliaj.
 
Në sajë të këtij projektligji, bashkive i hiqet e drejta për të zgjedhur drejtorët e shkollave. Por sipas kryebashkiakut Erion Veliaj, nuk mundet që investimet t'i bëjë bashkia dhe ministria e Arsimit të bëjë politikat,

"Një drejtor shkolle nuk mund të ketë dy drejtues", - theksoi ai.

"Për shkollat, e vetmja kompetencë që nuk do keni është emërimi i drejtorëve. Decentralizimi asnjëherë nuk ka fund", - u shpreh kreu deputeti i PS Bashkim Fino.
 
Më herët kryebashkaiku Veliaj e ka parë si paradoks që bashkive i kalohet në kompetencë edhe menaxhimi i pyjeve, ndërsa nga ana tjetër Ministria e Mjedisit merr nën administrim menaxhimin e muzikë së lartë në lokalet brenda qytetit. Fino tha se duhet që menaxhimi i ndotjes akustike të kalojë në kompetencën e bashkive.
 
Redaksia Online
(Gre.M/Shqiptarja.com)

/Shqiptarja.com