Venezuela ka miratuar një ndryshim ligjor që do ta bëjë më të lehtë për kompanitë e huaja të marrin pjesë në industrinë e naftës së vendit, një akt i Karakasit për të përmbushur kërkesat e presidentit amerikan Donald Trump.

Reforma, e mbështetur nga presidentja në detyrë Delcy Rodríguez, do ta hapë industrinë venezueliane të naftës, aktualisht e kontrolluar kryesisht nga kompania shtetërore Petróleos de Venezuela (PDVSA) dhe do t’u lejojë kompanive të huaja të menaxhojnë fushat e naftës me rrezikun dhe koston e tyre.

Që nga momenti kur SHBA-ja arrestoi presidentin Nicolás Maduro, në fillim të janarit, Rodríguez e ka bërë vazhdimisht të qartë se dëshiron që kompanitë amerikane të investojnë në industrinë e naftës në Venezuelë.

Venezuela ka më shumë rezerva të provuara nafte se çdo vend tjetër në planet. Ligji i ri mund ta ndihmojë vendin të maksimizojë fitimet prej tyre, tha Rodríguez të enjten në mbrëmje. “Ky ligj na lejon të bëjmë një hap cilësor vërtet historik për t’i kthyer këto rezerva nafte, më të mëdhatë në planet, në lumturinë më të madhe që mund të ketë një popull, me popullin venezuelian si pronarin e ligjshëm të asaj lumturie,” u tha ajo pjesëmarrësve në një aktivitet të dedikuar për këtë vendim.

Kryetari i Asamblesë Kombëtare, Jorge Rodríguez, vëllai i presidentes në detyrë, e përsëriti këtë qëndrim.

“Ky instrument do të nxisë sektorin energjetik, duke promovuar prodhimin e naftës në fusha të pashfrytëzuara dhe duke e shndërruar atë në mirëqenie për popullin venezuelian,” tha ai në Telegram.

Legjislatura e Venezuelës e miratoi unanimisht reformën të enjten pasdite në lexim të dytë. Ajo tani duhet të nënshkruhet nga Rodríguez dhe të publikohet përpara se të hyjë në fuqi.

Më herët gjatë këtij muaji, dy burime i thanë CNN se administrata Trump po planifikon të përdorë kontraktorë privatë ushtarakë për të mbrojtur asetet e naftës dhe energjisë në vend.

Megjithatë, disa drejtues të industrisë së naftës kanë shprehur shqetësim për idenë e dërgimit të kapitalit në Venezuelë. Drejtori ekzekutiv i Exxon Mobil tha në një takim në Shtëpinë e Bardhë, pak pas arrestimit të Maduros, se vendi është “i painvestueshëm” në gjendjen e tij aktuale.

Ligji u miratua në të njëjtën ditë kur Departamenti Amerikan i Thesarit lehtësoi disa sanksione ndaj industrisë së naftës së Venezuelës. Ai lëshoi një licencë të përgjithshme që autorizon kompanitë amerikane të kryejnë aktivitete të caktuara me qeverinë venezueliane, të lidhura me eksportin, blerjen, shitjen, magazinimin dhe transportin e naftës së vendit, ndër operacione të tjera.

Ky ishte lehtësimi më i fundit i kufizimeve nga administrata Trump, pasi qeveria venezueliane në detyrë sinjalizoi se do të bashkëpunonte me SHBA-në dhe do të përmbushte shumë nga kërkesat e saj.

Më herët të enjten, Trump tha se e kishte informuar Rodríguez-in se SHBA-ja do të “hapte” hapësirën ajrore tregtare mbi Venezuelë, edhe pse ajo teknikisht nuk konsiderohet e mbyllur. Kjo vjen dy muaj pasi Trump lëshoi një direktivë të gjerë në rrjetet sociale, duke paralajmëruar linjat ajrore, pilotët dhe rrjetet kriminale të shmangnin hapësirën ajrore të Venezuelës.

“Qytetarët amerikanë, shumë shpejt, do të jenë në gjendje të shkojnë në Venezuelë dhe do të jenë të sigurt atje. Është nën një kontroll shumë të fortë,” tha Trump të enjten në një mbledhje të kabinetit të tij.

Jorge Rodríguez ia atribuoi njoftimin e Trump-it përpjekjeve diplomatike të motrës së tij.

“Mendoj se është shumë pozitive. Besoj se është një pasojë e drejtpërdrejtë e diplomacisë së paqes që është zhvilluar nga presidenca,” tha ai.