Vetëvendosja: Aksion tjetër
në pikat kufitare, në 22 jana

Vetëvendosja paralajmëroi aksion të ri kundër moszbatimit të masave të reciprocitetit ndaj Serbisë nga Qeveria e Kosovës.

Pas bllokimit të pikave kufitare në Merdarë dhe Dheu i Bardhë, aktivistët e Vetëvendosjes thanë se nuk do të zmbrapsen nga qëllimi i tyre. Nënkryetari i Vetëvendosjes, Shpend Ahmeti, lajmëroi se aksioni i ardhshëm do të zhvillohet më 22 janar.

“Sipas qëllimit që kemi pasur edhe në aksionin e parë, në mbrojtje të vendimit të Kuvendit të Kosovës, ne tani kemi paralajmëruar se më 22 janar - të dielën e radhës, do të kemi aksionin në Merdare dhe te Dheu i Bardhë. Po ashtu, kemi thënë se nëse Qeveria e Kosovës nis zbatimin e reciprocitetit të plotë me Serbinë gjatë kësaj jave, natyrisht se nuk do ta mbajmë këtë protestë dhe se nuk ka arsye që Vetëvendosja të qëndrojë atje në dy pikat kufitare”, tha Ahmeti.

Gjatë fundjavës qindra protestues ishin mbledhur në këto dy pika kufitare.

Për të shpërndarë protestat, Policia e Kosovës përdori forcën fizike, gazin lotsjellës dhe topat e ujit. Anëtarët e Vetëvendosjes akuzuan për përdorim të tepruar të dhunës ndaj protestuesve. Ahmeti tha se dhuna ka qenë e tepruar dhe se ndërhyrja ishte brutale.

“Mendoj se ajo ka qenë gjithçka pos një intervenimi të duhur dhe në nivel. Pra, mendojmë se është përdorur dhuna tej mase dhe se është përdorur një brutalitet që përkon me një shtet policor”, vlerësoi Ahmeti.

Ndërkohë, zëdhënësi i Policisë së Kosovës, Baki Kelani, hodhi poshtë akuzat e Ahmetit.

“Në asnjë mënyrë Policia e Kosovës nuk ka ushtruar dhunë të tepruar dhe asnjë personi nuk i ka shkaktuar dhunë të tepruar. Policia e Kosovës ka përdorur forcë proporcionale të arsyeshme dhe të domosdoshme për të vënë nën kontroll situatën”, u shpreh Kelani. ah/Shqiptarja.com