NAPOLI, Itali - Nën kraterin e Vezuvit dhe me 50 mijë zemra në stadium dhe miliona të tjera në mbarë botën, Napoli është shpallur zyrtarisht kampion i Italisë për herë të katërt në histori. ‘Scudetto’ në Itali këtë sezon u vendos me ‘fotofinish’ dhe u desh java e 38-të dhe e fundit që napoletanët e Antonio Contes të siguronin titullin matematikisht.

Në një garë të ethshme me Interin që deri para sfidës ishte kampion në fuqi, Napoli me një pikë më shumë (82) mposhti 2-0 Cagliarin për të përflakur qytetin nga flakadanët e tifozëve që kishin mbushur sheshet dhe ishin afro 150 mijë duke e ndjekur në ekranet gjigande. Paçka se Interi fitoi në Como, me vetëm një pikë më shumë Napoli siguroi titullin nën drejtimin e Contes.

NDESHJA - Përballja në ‘Maradona’ nisi qysh në drekë, me dhjetra mijëra tifozë që u grumbulluan në baret dhe sheshet e qytetit, teksa pasditja ishte e kaltër në Napoli. 50 mijë në stadium dhe më shumë se 150 mijë në sheshet dhe rrugët e qytetit i dhanë një karikim shtesë ekipit.

Dueli nisi mirë për Napolin, por ishte portieri i Kombëtares, Alen Sherri, që në tre raste ndali sulmin e vendasve, duke shmangur golat. Megjithëse shkodrani ishte në një ditë të mirë, ai nuk mundi të ndalte golin me gjysmë-roveshatë të Scott McTominay në minutën e 42-të. Skocezi është njeriu i sezonit për Napolin duke gjetur golin e 13-të në vitin e parë në Serie A.

Fraksioni i dytë nisi ashtu siç u mbyll, me asistin e Rrahmanit që u shfrytëzua mirë nga Lukaku për golin e dytë në minutën e 51-të. Minutat kalonin dhe Napoli kontrolloi lojën për të bërë që tifozët të digjnin gjithë arsenalin e flakadanëve brenda dhe jashtë stadiumit, madje në një moment u duk se Vezuvi ‘u zgjua’. Rezultati mund të ishte më i thellë në favor të vendave nëse një super Alen Sherri nuk do ishte në ditën e tij më të mirë për miqtë.

Me tri pikët e fundit për këtë sezon, Napoli siguron kështu trofeun e katërt të Serie A në histori duke ulur nga froni Interin. Më herët Napoli është shpallur kampion edhe në sezonet 1986-87, 1989-90 dhe 2022-23.

AMIR RRAHMANI - Për kapitenin e Kosovës, shqiptarin Amir Rrahmani ky është titulli i dytë kampion në Serie A pasi ka qenë pjesë e ekipit edhe dy sezone më parë.

ANTONIO CONTE - Trajneri që riktheu energjinë dhe besimin në grup ia del që të fitojë trofeun e pestë në Serie A nga stoli, pasi më herët e ka bërë këtë me Juventusin (nga 2011-2014) dhe me Interin në sezonin 2020-21. Kësisoj Conte fiton Serie A me tre skuadra të ndryshme si trajner

Serie A, raundi i 38-të (i fundit):

E premte, 23 maj 2025 - 20:45

Como 0-2 Inter (de Vrij 20’, Correa 51’)

Napoli 2-0 Cagliari (McTominay 42’, Lukaku 51’)

Renditja:

S.Dh/Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Sondazhi i ditës: 3 Dhjetor, 08:56

    Çfarë mendoni për lëvizjen e Salianjit brenda PD?

Lajme të tjera