TIRANE - Në një deklaratë për mediat ambasada e Shteteve të Bashkuara të Amerikës ka njoftuar se nga data 21 dhjetor do të implementohen procedura të reja aplikimi për vizat jo-emigruese. Ambasada njofton se procedurat e reja do të jenë në dispozicion të qytetarëve në fund të dhjetorit

“Më 21 Dhjetor 2012 Seksioni Konsullor i Ambasadës së SHBA në Tiranë do të implementojë një procedurë të re aplikimi për vizat jo-emigruese për të udhëtuar drejt Shteteve të Bashkuara. Ndryshimet në procesin e aplikimit do të jenë thelbësore. Si rezultat i kësaj, aplikantët e vizave nuk do të jenë në gjendje të caktojnë data takimi për viza jo-emigruese nga datat 11-21 Dhjetor. Vetëm aplikantët me takimet e planifikuara paraprakisht do të intervistohen gjatë kësaj periudhe.

Më 21 Dhjetor procedura e re do të hyjë në fuqi dhe aplikantët mund të caktojnë përsëri takime; megjithatë, takimet e para të disponueshme do të fillojnë më 4 Janar 2013. Aplikantët nuk do të jenë në gjendje të caktojnë data takimi gjatë periudhës kohore 21 Dhjetor 2012 - 3 Janar 2013.

Individët që dëshirojnë të udhëtojnë në Shtetet e Bashkuara në muajt Dhjetor 2012 dhe Janar 2013 janë të lutur të aplikojnë për vizë sa më shpejt që të jetë e mundur. Detajet rreth procedurës së re do të jenë në dispozicion në fund të dhjetorit; nuk janë planifikuar ndryshime të tarifës së vizës dhe aplikantët përsëri duhet të paraqiten personalish për një intervistë. Ndryshimet lidhen vetëm me procesin e aplikimit; kërkesat standarde për kualifikimin për vizë jo-emigruese mbeten të njëjtat”, thuhet në deklaratën e SHBA-së.

(eç/shqiptarja.com)