Vllaznia B është ekipi kampion i Kategorisë së Tretë. Në finalen e zhvilluar të premten në “Shtëpinë e Futbollit”, kuqeblutë triumfuan ndaj Albpetrolit me rezultatin 4-2.

Takimi u zhbllokua në minutën e 24-t nga Papaj, ndërsa Zekaj dhe Naza në minutat 57 dhe 60 e çuan avantazhin në 3-0 për Vllazninë B.

Albpetroli reagoi në minutën e 71-të me golin e Hyskës, por Vllaznia B riktheu epërsinë e thellë me golin e katërt të shënuar nga Halili. Në fund të ndeshjes, Albpetroli shënoi me Gjonin, por pa arritur të ndryshojë fatin e takimit, i cili u mbyll 4-2 për Vllazninë B.

Të dyja skuadrat nga sezoni i ri do të garojnë në Kategorinë e Dytë.

Në përfundim të ndeshjes u zhvillua ceremonia e dorëzimit të trofeut dhe medaljeve nga Federata Shqiptare e Futbollit, ku anëtari i Komitetit Ekzekutiv të FSHF-së, Envi Hicka, i dorëzoi kupën dhe medaljet ekipit kampion të Vllaznisë B.