Vlorë, Shpëtim Gjika pranon:
Firmosa pa miratimin e KRT

TIRANE- Shpëtim Gjika, kryebashkiaku i Vlorës, duket se ka bërë autogol gjatë periudhës së hetimit të çështjes në ngarkim të tij nga ana e prokurorisë. Prokurorë dhe oficerë të njësisë Task-Forcë, pranë prokurorisë së Vlorës, e kanë pyetur Gjikën tre herë për çështjen e ndërtimit të dy pallateve dhe se në të treja dëshmitë, që tashmë janë administruar në dosjen hetimore, Shpëtim Gjika ka pranuar se ai kishte lëshuar lejën e ndërtimit, por që në fakt atë nuk e kishte kaluar në votëbesim.

Sipas tre deklarimeve të Gjikës të dhëna në prokurorinë e Vlorës, kryebashkiaku pranon se ka lëshuar për personat, pronarë të truallit vërtetim për lejë ndërtimi, por në fakt ky veprim sipas tij është keqpërdorur nga të pandehurit e tjerë të kësaj çështje dhe administratorët e dy firmave të ndërtimit, të cilët nëpërmjet këtij dokumenti kanë filluar punimet për hapjen e gropave dhe njëherësh kanë filluar ndërtimin e objeketve. Pyetjes së prokurorëve të njësisë hetimore, Task-Forcë Vlorë, se persë kryebashkiaku Gjika nuk ka ndaluar punimet e këtyre dy objekteve, nëpërmjet inspektoriatik ndërtimor të bashkisë dhe policisë Bashkiake, Shpëtim Gjika në një rast, ka dhënë përgjigjen se nuk i janë paraqitur si raste të shkeljes urbanistike. Mirëpo, kjo përgjigje sipas akuzës së Vlorës, është kontradiktore dhe me dy deklarimet e tjera, që Gjika ka dhënë në prokurori. Sipas akuzës në dy vendimet e KKRT që gazeta Shqiptarja.com i disponon nuk është marrë asnjë vendim për lejë ndërtimi pallati.

3 herë dëshmi
Kryebashkiaku Gjika, gjatë fazës së hetimit të dosjes nga prokuroria ka qënë tepër bashkëpunues me hetuesit, të cilët e kanë thirur tre herë, dhe në të treja rastet Shpëtim Gjika është paraqitur në prokurori ku ka dhënë deklarime. Burimet shprehen se në dëshminë e tij, Gjika flet duke pranuar se ka lëshuar një vërtetim për leje ndërtimi, me pretendimin se në ditët në vijim, çështjen do e kalonte për diskutimin dhe votëbesim në mbledhjen e KKRT-së. Më tej Gjika, nënvizon në dëshminë para prokurorëve se ai deri këtu ska kryer asnjë shkelje, por I vetmi document që është lëshuar me firmën e tij, është keqinterpretuar nga personat Aleks Ahmetaj, Artan Ferrati, Mustafa Tartari Blerdi Liçaj,Gëzim Feta dhe Gentian Sherifaj, të cilët në bashkëpunim me njëri-tjetrin, kanë vendosur të fillojnë punimet.

Pikërisht këtë veprim, Gjika e ka quajtur të paligjshëm, por jo nga ana e tij, por nga ana e ndërtuesve dhe pronarëve të tokës, që kanë keqpërdorur dokumentacionin e tij, duke e paraqitur atë si leje ndërtimi, kur në fakt sipas Gjikës, nuk ishte një e tillë. Mirëpo edhe pse punimet janë kryer në mes të ditës dhe në sy të inspektorëve të ndërtimit në Bashkinë e Vlorës, vetë Shpëtim Gjika, nuk ka marrë asnjë masë për parandalimin e këtyre ndërtimeve apo pezullimin e punimeve, kur një gjë e tillë është bërë pak muaj më parë pas një vendimi sekuestro, të marrë nga prokuroria e Vlorës.

Drejtori fitoi lejë
Njëri nga personat që ka përfituar nga veprimet e dyshimta të kryebashkiakut Gjika, është i pandehuri Gentian Sherifaj, administrator i kompanisë “Enbio Shpk”. Mirëpo, Sherifaj nga hulumtimet e prokurorisë ka rezultuar se është vartësi i Shpëtim Gjikës, pasi në bashki mban postin e Drejtorit të Infrastrukturës dhe Zbatimit të Projekteve. Ky fakt e rëndon akoma dhe më tepër situatën, pasi leja e ndërtimit në teritorin e portit, është marrë nga një punonjës bashkie, dhe më konkretisht nga Drejtori i Infrastrukturës dhe Zbatimit të Projekteve në qytetin e Vlorës.
 
Shkrimi u publikua sot (29.10.2013) në gazetën Shqiptarja.com (print)

Redaksia Online
(d.d/shqiptarja.com)