Vodhi prindërit, sajoi
skenën e grabitjes

TROPOJË - 16-vjecari inskenon një skenë vjedhjeje nga frika e prindërve, zbulohet pas një muaji nga policia. Grupi hetimor i komisariatit të policisë së rrethit të Tropojës ka zbardhur dje një ngjarje të ndodhur një muaj më parë në lagjen “Dardania” të qytetit të Bajram Currit.
Policia bëri me dije se 16-vjecari XH.Gj. ka pranuar se ka inskenuar një grabitje nga frika e prindërve të tij, pasi u kishte vjedhur 110 paund, 5000 lekë, dhe më pas duke vetplagosur veten për ta bërë ngjarjen sa më të besueshme.
Ngjarja e rrallë ka ndodhur pak javë më aprë, kur 16-vjeçari ka bërë denoncimin se në banesën e shtetasit Gëzim Gjocaj kishin hyrë dy persona të paidentifikuar dhe në tentativë për të marrë një shumë lekësh, janë përplasur me djalin e shtëpisë duke e plagosur me mjete prerëse.
Ndërkohë, nga kqyrja e vendit të ngjarjes rezultoi se, në një dollap në një nga mjediset e shtëpisë kishin qenë 220 paund dhe 20.000 lekë. Nga "grabitësit" është arritur të merren 110 paund dhe 5.000 lekë, ndërsa pjesa tjetër është lënë sipër rrobave. Për këtë ngjarje ishin shoqëruar në mjediset e komisariatit edhe 10 persona, ndërsa më pas ka rezultuar se e gjithë ngjarja ishte e inskenuar nga vetë djali 16 vjeçar i shtëpisë. Ndaj 16-vjecarit ka nisur cështja penale për kallëzim të rremë për vjedhjen e banesës.

(aq/atsh/shqiptarja.com)