Votimi në OKB, Presidenca:
Bushati s'u konsultua me Metën

Zëdhënësi i Presidentit të Republikës, Tedi Blushi, i pyetur nga Report TV mbi votën e djeshme të Shqipërisë kundër SHBA-së në OKB pohoi se: Presidenti i Republikës nuk është konsultuar dhe informuar paraprakisht lidhur me qëndrimin që do të mbahej ndaj kësaj çështjeje të rëndësishme, jo vetëm për politikën e jashtme të Shqipërisë, por për mbarë kombin shqiptar.

Presidenti vlerëson se ky qëndrim dhe kjo votë kundër, tërësisht e panevojshme, nuk pasqyron një qëndrim shtetëror dhe aq më tepër një qëndrim e konsensus mbarëkombëtar. Presidenti thekson se nuk duhet të harrojmë se SHBA mbetet aleati dhe partneri me i rëndësishëm strategjik, ndaj qëndrime e vendime të tilla që duhet të jenë të mirë koordinuara. Populli dhe kombi shqiptar nuk e harrojnë kurrë dhe i janë mirënjohës vendimeve historike të SHBA-së lidhur me ekzistencën jetike të kombit dhe të ardhmen euroatlantike të Shqipërisë dhe të Kosovës.

OKB ka votuar dje me 128 vota pro, 9 kundër dhe 35 abstenim projektrezolutën që rrëzon vendimin e Donald Trump për të shpallur Jeruzalemin si kryeqytetin e Izraelit. Shqipëria është rreshtuar krah vendeve që votuan kundër SHBA. Mes 9 shteteve që kanë votuar kundër rezolutës së OKB e cila është mbështetur edhe nga BE, kanë qenë SHBA dhe Izraeli, ndërsa në 35 vendet që abstenuan është edhe Kanadaja.


(Tabela e votimit të rezolutës në OKB)

Er.K/Shqiptarja.com