Vrasja e lezhjanëve në Itali,
familja: Marrim hak me Kanun

Familjarët e dy kushërinjve, Agron dhe Alban Lleshaj që u ekzekutuan dy ditë më parë në Canegrate në Itali, deklarojnë se i njohin autorët e vrasjes dhe do të marrin hak ndaj tyre sipas ligjeve të Kanunit.

'Corriere della Sera' shkruan sot se familjarët e shqiptarëve nuk pranojnë të bashkëpunojnë me policinë dhe hetuesit italianë, por shprehen se do ta vendosin vetë drejtësinë në vend.

Në artikullin e publikuar nga gazeta italiane thuhet se familjarët e Agron dhe Alban Lleshajt duan të marrin gjak, sipas ligjeve të Kanunit, të cilat vijojnë të funksionojnë ende në zonat përreth Lezhës, ku kanë lindur kushërinjtë e vrarë në Itali.

Familjarët e viktimave jetojnë një pjesë në Shqipëri dhe një pjesë tjetër në Lombardi.

Hetimet e policisë dhe prokurorisë italiane po vijojnë me shpejtësi të madhe, por mediat thonë se ata kanë në dispozicion pak kohë, sepse hakmarrja mund të fillojë më herët duke shkaktuar kështu një spirale dhune, e cila, siç konstatohet nga burimet e hetuesve, në Shqipëri tashmë është duke u përgatitur.

Lleshajt dhe armiqtë e tyre
Sipas mediave italiane, Alban Lleshaj ishte takuar me disa bashkëkombas të tij, para vrasjes, jo larg vendit ku u ekzekutua me armë. Dyshohet se Lleshaj ka debatuar me ta për shkak të konflikteve të vjetra apo prishje të pazareve të drogës.

Albani ka telefonuar kushëririn e tij Agronin dhe në momentin kur ka hipur në makinën e tij 'Volkswagen Polo', janë qëlluar të dy me armë zjarri. Sipas hetuesve, Albani ka humbur jetën menjëherë, ndërsa kushëriri i tij ka vijuar të drejtojë makinën i plagosur, për rreth 250 metra, derisa ka humbur jetën. 

Dy shqiptarët Agron e Alban Lleshaj, 24 e 32 vjeç u ekzekutuan me 10 plumba mbrëmjen e së enjtes, rreth orës 22.54 në Canegrate, në Itali.

(er.nu/shqiptarja.com)