Deklaratat e një sërë mediash greke, se ushtari grek Konstantinos Katsifas u vra nga RENEA për shkak se ngriti flamurin grek në Bularat të Gjirokastrës, janë hedhur poshtë nga agjencia zyrtare e lajmeve ANA-MPA.
Duke iu referuar “burimeve kompetente” të policisë greke, kjo agjenci ka bërë të ditur se “nuk ka të dhëna dhe as dëshmi që të ndërlidhin përleshjen e armatosur në Shqipëri, gjatë së cilës ra i vdekur Konstantinos Katsifas, me ngritjen e flamurit grek”.
Duke u mbështetur tek po të njëjtat burime, agjencia ka deklaruar gjithashtu se që në momentin e parë të incidentit ka patur një komunikim të drejtorit të përgjithshëm grek, gjeneral Aristidis Andrikopoulos me homologun e tij shqiptar.Megjithatë, ANA-MPA shkruan,sikurse edhe mediat greke e vendase, se Katsifas ishte paraqitur në festën e zhvilluar në fshatin Bularat me rroba ushtarake dhe i armatosur me një armë kallashnikov.
Agjencia e lajmeve ka pohuar se ushtari grek fillimisht ka qëlluar në ajër dhe më pas kundër një makine policie që ndodhej në lëvizje.
“Në vazhdim u largua. Policia filloi kërkimin e tij dhe në fund u lokalizua në një pllajë mali, ku ndodhet edhe shtëpia e tij. Policia shqiptare urdhëroi ndërhyrjen e forcave speciale, të cilat mbërritën në zonë me helikopter. U shënuan të shtëna armësh, me rezultat vdekjen e Konstantino Katsifas”, ka shkruar më tej ajo, duke shtuar se “pranë te vdekurit u gjetën 8 gëzhoja, një çantë me rreth 100 fishekë kallashnikovi, thika dhe ushtarake dhe një lak ushtarak.”
