Vranë 72 vjeçarin në Memaliaj për 4 trungje, trupi u hodh në përrua! Krimi u nxit nga çifti fqinj e kreu nipi 23 vjeç, i ndihmoi dhe i biri! Motivi dhe dinamika

Gjirokastër- Zbardhet vrasja e 72 vjeçarit Faik Ajdini të ndodhur më 19 gusht 2024 në fshatin Zhapokik 2 të Memaliajt në Gjirokastër. Kur i moshuari nuk kishte shkuar në banesë familjarët kishin nisur kërkimet duke e gjetur të pajetë 24 orë më pas në një përrua. Nga këqyrja paraprake e kufomës u kuptua se kishim të bënim me vrasje të shkaktuar me mjet prerës. Tre ditë më pas policia e Gjirokastër zbardhi krimin dhe arreston autorët

Kush janë autorët?
Katër bashkëfshatarë. Skëndër Ajdini, 71 vjeç dhe bashkëshortja e tij Darovi Ajdini, 64 vjeçe, nipi i tyre, Blerti Kanushi, 23 vjeç dhe djali i tyre, Bledar Ajdini, 43 vjeç. 23-vjeçari rezulton me precedent të mëparshëm penal, pasi rreth 7 muaj më parë ishte shpallur në kërkim për trafik kokaine. Report Tv mëson se më 6 shkurt Sektori i Antidrogës në Policinë e Tiranës arrestoi dy persona dhe shpalli në kërkim bashkëpunëtorin e tyre 23-vjeçarin Blerti Kanushi, i cili kishte rolin e ndërmjetësuesit në grupin e shpërndarjes së lëndës narkotike.

Motivi?
Burimet të sigurta nga gurpi hetimor bënë me dije se vrasja ka ndodhur për shkak të 4 trungjeve të cilat kishin pasur në tokën e tyre çifti Ajdini, dhe për të cilët ata dyshohen se i kishte marrë viktima, Faiku.  

Si ndodhi vrasja?
Vetë drejtori i policisë doli sot në një deklaratë për median për të treguar dhe dinamikën e vrasjes që ka ndodhur në orën 07:00 të mëngjesit të 19 gushtit.

Çifti i bashkëshortëve, Skënder dhe Darovi Ajdini kanë nxitur nipin e tyre për të vrarë bashkëfshatarin. Madje kanë krijuar kushtet dhe siguruar mjetet. Pas krimit ata kanë ndihmuar për të zhdukur provat, ndërsa autori është larguar.

“Nga dinamika hetimore u konkludua se për shkak të konflikteve për motive të dobëta ndërmjet viktimës, shtetasit Faik Ajdini, dhe bashkëshortëve Skënder dhe Darovi Ajdini, këta të fundit kanë nxitur shtetasin Blerti Kanushi, 23 vjeç, i kanë krijuar kushtet dhe i kanë siguruar mjetet, për kryerjen e vrasjes. Ky shtetas, në bashkëpunim me shtetasin Skënder Ajdini, më datë 19 gusht 2024, rreth orës 07:00 të mëngjesit, kanë kryer vrasjen me thikë të shtetasit Faik Ajdini dhe më pas Blerti Kanushi është larguar nga vendi i ngjarjes. Pas kryerjes së krimit, Skëndër Ajdini me shtetasen Darovi Ajdini kanë kryer veprime aktive për pengimin e zbulimit të së vërtetës, duke bërë përpjekje për të zhdukur provat e krimit. Shtetasi Bledar Ajdini, në dijeni të plotë për krimin, ka përkrahur autorin e krimit, duke mos informuar institucionet ligjzbatuese për vendndodhjen e tij.  tha drejtori i Policisë së Gjirokastrës, Ardian Çipa.

Hetimet
Pasi u zbulua se kishim të bënim me një vrasje dhe jo vdekje u ngrit një grup i posaçëm hetimor, për të hetuar dhe zbardhur këtë ngjarje të rëndë, si dhe për të sqaruar rrethanat e ndodhjes së saj,

Hetimet u kryesuan nga prokurori i Prokurorisë së Juridiksionit të Përgjithshëm Gjirokastër z. Bledar Bala dhe i përbërë nga 2 zëvëndësdrejtorët e Drejtorisë Vendore të Policisë Gjirokastër, specialistë të Seksionit për Krimet e Rënda, Shefi i Komisariatit të Policisë Tepelenë, Shefi i Stacionit të Policisë Memaliaj, specialistë të Seksionit të Policisë Shkencore, ekspertë mjeko-ligjorë, si dhe struktura të tjera të Drejtorisë Vendore të Policisë Gjirokastër.

Për thellimin e hetimit u fiksuan dhe u morën për ekzaminime të mëtejshme sende dhe mjete të cilat dyshohej se kishin lidhje me rrethanat e ngjarjes dhe që ekzaminimi i të cilave do të identifikonte autorin dhe do të dokumentonte me prova ligjore ngjarjen. Shumë persona u morën në pyetje, u bënë verifikime, kontrolle dhe ekspertime.

“Nga hetimet intensive, inteligjenca policore, deklarimet e ndryshme dhe ekzaminimet biologjike të provave, u arrit të sqarohet motivi dhe të dokumentohet me prova ligjore autorësia e kësaj ngjarje të rëndë, me pasojë vdekjen e shtetasit Faik Ajdini” tha drejtori i policisë së Gjirokastrës Çipa

Arrestimet
Pasi u sqaruan rrethanat e ngjarjes nisi puna për lokalizimin dhe arrestimin e Blerti Kanushit dhe sekuestrimin e të gjitha provave që dokumentonin autorësinë e tij në këtë krim të rëndë.

Më datë 20 gusht 2024 në orën 23:30, janë arrestuar në flagrancë shtetasit:

Skënder Ajdini, 71 vjeç për veprat penale “Vrasja me paramendim” e kryer në bashkëpunim, “Sigurimi i kushteve dhe mjeteve materiale për të kryer vrasje” dhe “Përkrahja e autorit të krimit”, parashikuar nga nenet 78/25, 80 dhe 302 të Kodit Penal;

 Bledar Ajdini, 43 vjeç, për veprën penale “Përkrahja e autorit të krimit”, parashikuar nga neni 302 i Kodit Penal.

Dy ditë më pas më datë 22 gusht ora 03:00  u arrestua në flagrancë Blerti Kanushi, 23 vjeç për vepren penale “Vrasja me paramendim”, kryer në bashkëpunim, parashikuar nga neni 78/25 i Kodit Penal. Gjitashtu prangat iu vunë edhe Darovi Ajdini, 64 vjeçe, për veprat penale “Veprime që pengojnë zbulimin e së vërtetës” dhe “Përkrahja e autorit të krimit”, parashikuar nga nenet 301 dhe 302 i Kodit Penal.

Gjendet thika
Policia ka arritur të gjejë, fiksojë dhe sekuestrojë në cilësinë e provës materiale dhe thikën me të cilën ka kryer krimin autori, si dhe sende e mjete të tjera të cilat kanë influencuar në rrethanat e ngjarjes, të shfrytëzuara nga të dyshuarit. Këto sende dhe mjete do t’iu nënshtrohen ekzaminimeve të mëtejshme shkencore.  

 

Blerti Kanushi

Rendit zhvillimet sipas orarit:

Të Fundit Të Parat

S.G/r.k./Shqiptarja.com

TAG:
• blerti kanushi
• Gjirokaster
• Faik Ajdini
• bledar ajdini
• darovi ajdini
• skender ajdini
• vrasja e faik ajdinit