Vuçiç betohet si President i Serbisë:
Kosova është pjesë e vendit tonë

Presidenti i ri i Serbisë, Aleksandar Vuçic është betuar këtë të mërkurë solemnisht në Kuvendin serb, për mandatin e ri që do të ushtroj për pesë vite. 

Ai është betuar mbi Kushtetutën e Serbisë dhe ligjeve përkatëse duke mos harruar pa përmendur edhe Kosovën që e sheh si pjesë të vendit.

“Betohem se do të përkushtohem me gjithë përpjekjet e mia për ta ruajtur sovranitetin dhe integritetin territorial të Republikës së Serbisë, duke përfshirë Kosovën si pjesë të saj si dhe realizimin e të drejtave të njeriut dhe pakicave”, u shpreh Vuçiç.

47-vjecari i cili deri më tani ka mbajtur postin e kryeministrit do të zëvendësojë Tomislov Nikoliç.  

Pak para se Vucic të betohej, në qendër të Beogradit u shënuan edhe disa përplasje mes mbështetësve të tij dhe kundërshtarëve por që u sheshuan nga autoritetet para se të mbërrinin në godinën e Parlamentit.

Por edhe deputetët opozitarë e pranishëm në Kuvend përveç mbishkrimeve “Nuk është presidenti im”, mbanin në duar edhe të tjera, si: “Nuk dua tradhtar për president”, “Marrëveshja e Brukselit është tradhti”, “ “E ke shitur Kosovën”. 

Ndaj këtyre protestave, presidenti i ri i Serbisë, Aleksandar Vuçic, reagoi duka u dërguar një puthje me dorë.

Fitorja e Vuçiç në zgjedhjet e 2 prillit erdhi gati një vit pasi, Partia Progesive Serbe, që udhëhiqej nga Vuçiç,  fitoi zgjedhjet parlamentare.Vuçiç ka forcuar kontrollin e tij në pushtet dhe ai e konsideron veten reformator në rrugën e Serbisë drejt anëtarësimit në Bashkimin Evropian.

Presidenca në Serbi është një post ceremonial, po besohet se Vuçiç do të vijojë të ushtrojë ndikimn e tij në politikën e vendit edhe pse do të jetë në prapaskenë. Madje disa kritikë kanë paralajmëruar se kontrolli i Partisë Progresive Serbe mbi tërë fuqinë legjislative dhe qeverisëse mund të shtyjë Serbinë drejt një autokracie.
 
Redaksia Online
Al.N/Shqiptarja.com