Xhafaj i përgjigjet LSI: S'të bën
Policia forcë të parë, por vota

​Ish-ministri i Brendshëm, Fatmir Xhafaj i është përgjigjur Lëvizjes Socialiste për Integrim, pas sulmeve të kësaj të fundit ndaj Policisë, duke i kujtuar se forcë të parë politike në 25 qershor mund ta nxjerrë vota dhe jo Policia. 

Gjatë një deklarate për shtyp, Xhafaj nuk kurseu as kritikat në adresë të Prokurorisë, e cila, siç tha ai, nuk ka hetuar rastet e incidenteve të ditëve të fundit, ndërsa shtoi se policia ka bërë punën duke i referuar çdo rast dhune. 

"Policia nuk të bën forcë e parë, forcë e parë të bën vota. Dënoj çdo akt dhune në procesin zgjedhor dhe ndëshkim ligjor.

 Policia ka rolin e saj në parandalimin e ngjarjeve, por të mos harrojmë se një rol të rëndësishëm ka prokuroria e shtetit. Flitet për disa ngjarje të cilat i janë referuar Prokurorisë, por askush nuk kërkon hesap ndaj prokurorëve të cilët kanë përgjegjësinë për zbardhjen e shpejtë të kësaj ngjarje. 

Prokuroria të veprojë shpejt për të zbardhur ngjarjet që cenojnë atmosferën e mirë në këtë proces zgjedhor. Prokurorët të mos mbyllin shpejt e shpejt dosjet e fundit, sapo hyri në fuqi Kodi i Procedurës Penale, por të zbardhin këto ngjarje në mënyrë që të dihet e vërteta dhe të qetësohet klima elektorale", u shpreh Xhafaj. 

"Policia të ndëshkojë shitblerjen e votave"
Ndryshe nga akuzat e kryetarit të Kuvendit Ilir Meta dhe përfaqësuesve të LSI të cilët e quajnë Drejtorin e Përgjithshëm të Policisë së Shtetit "Haki Droga", ish-ministri i Brendshëm shprehur vlerësime për punën e tij. 

Xhafaj kërkoi ndëshkim nga policia të rasteve të shitblerjes së votave.  

"Kam ndjekur nëpërmjet medias një mesazh që ai u ka përcjellë drejtorëve të policisë në rrethe, ishte një mesazh shumë profesional. Drejtuesit e Policisë së Shtetit duhet të dënojnë ashpër çdo lloj përfshirje të policisë në proceset elektorale", tha Xhafaj. 

"Policia të godasë fort rastet e shitblerjes së votave", u shpreh ish-ministri i Brendshëm.  

Vettingu, Xhafaj: Zbatimi i reformës tashmë ka nisur
Fatmir Xhafaj, ish-kryetar i Komisionit të Posaçëm për Reformën në Drejtësi, ka deklaruar gjatë konferencës për shtyp nga Kryesia e Kuvendit se procesi i zbatimi të kësaj reformë tashmë ka nisur.

Xhafaj tha Reforma në drejtësi ishte një nga premtimet e PS-së, i cili u realizua brenda mandatit të parë qeverisës. 

“Reforma në drejtësi është një premtim i bërë nga ne në fillim të mandatit tonë që është duke u mbyllur. Është një nga premtimet dhe angazhimet e mbajtura. 

Ne jemi të vendosur për të vijuar në zbatimin e kësaj reforme. Shpresoj që 25 qershori të jetë dita që do hapë rrugën e shtetit të së drejtës, shtetit në shërbim të qytetarëve”, tha Xhafaj.