Yee në Prishtinë: SHBA do ta
ndihmojnë gjithmonë Kosovën

PRISHTINË - Presidentja e Kosovës, Atifete Jahjaga dhe kryeministri i Republikës së Kosovës, Hashim Thaçi pritën sot në një takim zëvendësndihmës sekretarin e Shteteve të Bashkuara të Amerikës, Hoyt B. Yee, me të cilin biseduan për zhvillimet politike në vend dhe rajon.

Yee iu shpreh Jahjagës, se vlerëson arritjet e Kosovës dhe tha se SHBA-ja do të vazhdojë ta ndihmojë atë në proceset nëpër të cilat po kalon, dhe vlerësoi se Kosova duhet të vazhdojë të punojë në demokratizimin e vendit dhe të thellojë reformat e saj të brendshme. Ai tha se SHBA do që të shoh Kosovën dhe gjithë rajonin e Ballkanit pjesë të BE-së.

Jahjaga vlerësoi marrëdhëniet e shkëlqyera me SHBA-në në të gjitha fushat dhe theksoi rëndësinë e përkrahjes së SHBA-së për zhvillimet demokratike në Kosovë. Ajo tha se vazhdimi i pranisë së SHBA-së në Kosovë dhe në rajon është e një rëndësie të veçantë për të ardhmen e vendit dhe për paqen e stabilitetin në gjithë rajonin e Evropës Juglindore.

Kryeministri Thaçi në takimin e tij informoi Yee për progresin që ka arritur Kosova në rrafshin politik, me theks të veçantë për implementimin e Marrëveshjes së 19 prillit, për normalizimin e marrëdhënieve ndërshtetërore në mes Republikës së Kosovës dhe Republikës së Serbisë, që u arrit në Bruksel me ndërmjetësimin e Bashkimit Evropian.
Kjo marrëveshje ka hapur një kapitull të ri në marrëdhëniet fqinjësore në mes Kosovës dhe Serbisë, duke i kontribuar në mënyrë të veçantë paqes dhe stabilitetit në rajon – tha kryeministri Thaçi.

Kryeministri Thaçi e njoftoi Yee edhe për zgjedhjet lokale të 3 nëntorit të cilat u mbajtën për herë të parë në gjithë territorin e Republikës së Kosovës, në një frymë të lirë, demokratike dhe sipas standardeve ndërkombëtare, si dhe për fillimin e negociatave për Marrëveshjen e Stabilizim Asociimit mes Kosovës dhe Komisionit Evropian.
Qeveria e Republikës së Kosovës, është e përkushtuar në përmbushjen e agjendës evropiane dhe euroatlantike – u shpreh kryeministri Thaçi.

Thaçi falënderoi Shtetet e Bashkuara të Amerikës për rolin mbështetës dhe konstruktiv, që po i japin të gjitha proceseve demokratike në Kosovë dhe theksoi përkushtimin e Qeverisë së Republikës së Kosovës që marrëdhëniet në mes Kosovës dhe Shteteve të Bashkuara të Amerikës të thellohen edhe më tutje.

Redaksia Online
(mag/shqiptarja.com)