Ylli ka inkurajuar çdo biznes apo sipërmarrës, që të rrisë aktivitetin e vet për të krijuar vende të reja pune, sikurse duhet të punojmë të gjithë për krijimin e një mjedisi pune më të denjë, më të sigurtë dhe më të shëndetshëm për qytetarët
Drejtori i Inspektoriatit të Punës, Dritan Ylli u shpreh se “Jo rastësisht kemi planifikuar të zhvillojmë këtë vizitë inspektimi në ditë të shtunë, pranë subjektit “Omega” shpk , i cili ka punësuar një numër të konsiderueshëm grash dhe vajzash, për të parë nëse respektohen pagesat për punën e kryer mbi orët normale javore të punës. Pra, puna që bëhet ditën e shtunë, ose kur tejkalohen orët normale javore të punës, duhet të ketë një pagesë ekstra bazuar edhe në dispozitat e Kodit të Punës së Republikës së Shqipërisë. Jemi shumë të kënaqur që kjo kompani, e respekton këtë dispozitë të Kodit të Punës, duke krijuar kështu një standart më të mirë të punës për punonjëset gra dhe vajza”.
Kreu i Inspektoriatit të Punës, theksoi se “Ne inkurajojmë çdo biznes apo sipërmarrës, që të rrisë aktivitetin e vet për të krijuar vende të reja pune, sikurse duhet të punojmë te gjithë për krijimin e një mjedisi pune më të denjë, më të sigurtë dhe më të shëndetshëm për qytetarët.Inspektorati i Punës do të ushtrojë të gjithë përgjegjësitë e tij, që i jep ligji që puna e kryer nga çdo punëmarrës në tregun e punës në Shqipëri, të mos trajtohet në kushte skllavëruese. Me argumentin e specifikës së proçesit të punës, ka punëdhënës që shkelin dispozitat e tejkalimit të orëve të punës, si në kohëzgjatjen ditore dhe në atë javore të saj, apo mosrespektimit të pagesave për punë të kryer në ditët e pushimit javor dhe festa zyrtare. Parë në këndvështrimin e inspektorit të punës, ky tejkalim i kohës normale mund të bëhet shkak për aksident në punë, si dhe moskompesim i punës së kryer nga punëmarrësit që ndryshe konsiderohet skllavëri moderne”.
Drejtori i Inspektoriatit sërish shprehu apelin e tij ndaj punonjësve për adresim pranë Inspektoratit të Punës të çdo rasti të mosrespektimit të legjislacionit të punës, duke shkelur të drejtat e tyre, sikurse dhe cdo rast të abuzimit me detyrën nga ana e inspektorëve të punës në terren.
"Ne garantojmë trajtimin me seriozitet maksimal të çdo rasti të ardhur" ka deklaruar Ylli.
Redaksia Online
(F.T/shqiptarja.com)