Edison Ypi komentoi mëngjesin e sotëm në Report Tv çështjen e detit me Greqinë, një temë që ka hapur debat të fortë politik, pas deklaratave nga Greqia se do të shtrihet 12 milje në det. Ypi deklaroi se nuk është shitur asnjë centimetër det, as në kohën e Berishës, dhe as tani nga Rama.

“Ministri i Jashtëm grek nuk tha asgjë, nuk ka as shitje, as blerje. Lulzim Basha dhe as Sali Berisha nuk kanë shitur asnjë det. Berisha në atë kohë, bravo i qoftë, bëri një lëvizje brilante fare, futi Shqipërinë në NATO, pa shitur asnjë centimetër det. Bëri lëvizje fantastike. Këtë po mundohet të bëjë dhe shtatlartësia e tij, nuk po shet asgjë. Madje nuk ka shitur as Çamërinë”, tha Edison Ypi.

Më tej, ai sqaroi telefonuesit se Vetting-u nuk mund të bëhet brenda ditës dhe të sjellë rezultate të menjëhershme, por do kohë.

“Vetting-u e të gjitha reformat nuk janë gjëra që bëhen në çast, që vijnë pas një vendimi, janë procese që vazhdojnë. Piramidat nuk i ka shpikur dhe sjellë në Shqipëri Sali Berisha. Fjala e lirë është gjëja më e bukur që ekziston në këtë botë, shyqyr që e arritën këtë gjë”, shtoi Ypi.

Edison Ypi prej disa ditësh ka nisur një bashkëpunim me Report TV si i ftuari i nderit për të komentuar në disa ditë të javës shtypin e ditës dhe bisedat me qytetarët në krah të gazetarit Andi Kapxhiu (nga ora 07:00 deri ne 8:30).

d.c./shqiptarja.com