Zbardhet kërkesa e opozitës dërguar ‘Kushtetueses’ për mandatin e Xhaçkës: Të përcaktohet mënyra kushtetuese si zgjidhet ky konflikt

Grupi Parlamentar i Partisë Demokratike ka depozituar sot kërkesën në Gjykatën Kushtetuese kërkesën lidhur me vendimin për mandatin e deputetes Olta Xhacka.

Në Gjykatën Kushtetuese është kundërshtuar vendimi nr. 41/2024, datë 11.04.2024 i Kuvendit të Shqipërisë “Për mosdërgimin e Mocionit në Gjykatën Kushtetuese” dhe deklarimin si të papajtueshëm me Kushtetutën e Republikës së Shqipërisë të këtij vendimi. Gjithashtu, kërkohet zgjidhja e konfliktit të kompetencave ndërmjet Kuvendit të Shqipërisë dhe subjektit kushtetues në konflikt, jo më pak se 1/10 e deputetëve, duke përcaktuar mënyrën kushtetuese konkrete sesi zgjidhet ky konflikt dhe sesi ushtrohet e drejta kushtetuese e pakicës parlamentare (një të dhjetës së deputetëve) për të mos u penguar mocioni i tyre nga Kuvendi në kushtet e mosverifikimit të pengesave formale, në kushtet ku mazhoranca me votim ka vendosur moszbatimin e vendimit nr. 1/2023 të Gjykatës Kushtetuese dhe kjo mund të ripërsëritet në të ardhmen.

Si pasojë e këtij konflikti kushtetuese grupi parlamentar i PD kërkon nga Gjykata Kushtetuese që të bënte edhe një interpretim përfundimtar të neneve 70, pika 1 dhe 4; 73, pika 1; dhe 132, pika 1, të Kushtetutës së Republikës së Shqipërisë, duke individualizuar edhe përgjegjësinë e deputetëve në rastet kur pengohet zbatimi i një vendimi të Gjykatës Kushtetuese.

Në kërkesën e zbardhur, 44 deputetë të opozitës, konstatojnë se vendimi i Kuvendit për të penguar dërgimin e papajtueshmërisë me mandatin të deputetes Olta Xhacka, është antikushtetuese, sepse:

(i). Bie ndesh me parimin e ndarjes dhe balancës mes pushteteve, si dhe autoritetin e Gjykatës Kushtetuese për të zgjidhur mosmarrëveshjet kushtetuese/bërë interpretimin përfundimtar të Kushtetutës, duke cenuar nenet 4, 7, 124, 131/1/e dhe 132 të Kushtetutës.

(ii). Bie ndesh me të drejtën e 1/10 së deputetëve të Kuvendit të Shqipërisë për të inicuar një proces kushtetues të kontrollit të papajtueshmërisë së mandatit të një deputeti të vetë Kuvendit të Shqipërisë, duke cenuar nenin 70, pika 4 e Kushtetutës dhe duke krijuar konflikt kompetencash midis shumicës dhe pakicës parlamentare.

(iii). Bie ndesh me nenin 70, pika 1 të Kushtetutës, sepse ka shtrirë efektet e parimit të “mandatit jodetyrues të deputetit” edhe për të bërë të paaplikueshëm detyrimin për të zbatuar vendimet e Gjykatës Kushtetuese, duke cenuar nenin 132 të Kushtetutës dhe duke u fshehur pas parimit të parashikuar në nenin 73, pika 1 e Kushtetutës.

Grupi Parlamentar i PD ka kërkuar edhe shqyrtimin me përparësi të kësaj çështje, për shkak se paraqet një interes të lartë publik, për garantimin e parimeve të shtetit të së drejtës, si dhe për të ruajtur autoritetin e Gjykatës Kushtetutese, dhe besimin e publikut tek kjo gjykatë.

44 deputetët e opozitës theksojnë se ky rast merr përmasat e një mbrojtje të pastër politike dhe pengimit të drejtësisë, po të mbahen në konsideratë edhe të dhënat e reja të hetuara dhe bëra publike nga SPAK. Nga ky hetim rezulton e provuar se pronësia mbi tokën është përfituar me dokumenta tërësisht të falsifikuara duke bërë të mundur që një tokë bujqësore, me një sipërfaqe në total prej 10.592 m2, e ndodhur në Dhërmi/Vlorë, në pronësi shtet, të tjetërsohet përmes transaksioneve tek të tretët në favor të subjektit privat në pronësi të bashkëshortit të deputetes Olta Xhacka.

Duke e konsideruar të papranueshme mbrojtjen politike dhe pengimin ndaj drejtësisë që mazhoranca po bën për rastin e ish-ministres dhe deputetes Olta Xhacka, duke penguar zbatimin e vendimit nr. 1/2023 të Gjykatës Kushtetutese, deputetët nënshkrues e konsiderojnë këtë një veprim që përbën minim të demokracisë dhe rrënon besimin e qytetarëve tek Gjykata Kushtetuese dhe sistemi i drejtësisë.

Lajmi kryesor:

44 deputetë të opozitës ridërgojnë në Kushtetuese mandatin e Xhaçkës, u bashkohen PL dhe dy ‘tradhtare’ të Bashës (EMRAT)

M.Q./Shqiptarja.com

TAG:
• mandati i Xhaçkës
• gazment bardhi
• gjykata kushtetuese
• Asllan Dogjani