Zbulohen arsyet/ Trump tregon 
pse e shkarkoi Tillerson

Pas shkarkimit të sotëm në mënyrë të papritur të Sekretarit amerikan të Shtetit Rex Tillerson, nga ana e presidentit Donald Trump, kanë mbërritur edhe reagimet e para.

Vetë presidenti Trump ka sqaruar disa nga arsyet që e shtynë të merrte këtë vendim dhe ka rrëfyer një detaj lidhur me çështjen e Koresë së veriut.

Në fakt, presidenti amerikan Donald Trump nuk u konsultua me Sekretarin e Shtetit lidhur me një marrëveshje të mundshme dhe të paprecedentë  për një takim me diktatorin koreanoverior Kim Jong Un.  

"E mora vet vendimin," tha Trump për gazetarët pak momenta më parë. Bisedimet do të jenë të parat e këtij lloji ndërmjet një presidenti amerikan dhe një udhëheqësi koreanoverior.

Të premten, Tillerson tha se vendimi i Trumpit për t’u takuar me Kim Jong Un “nuk ishte një surprizë”. Por ky koment u bë më pak se një ditë pasi Sekretarit i Shtetit tha se kushtet nuk ishin pjekur ende për negociata me Korenë e Veriut.

Presidenti Trump, duke u folur reporterëve përpara se të largohej nga Kalifornia sot, tha se ai dhe Rex Tillerson shkonin në përgjithësi mirë, por se ata kishin mendime të ndryshme mbi disa çështje.

Një prej këtyre çështjeve është marrëveshje bërthamore e Iranit, të cilën Trump e ka cilësuar si të tmerrshme.

"Vërtet që nuk e mendonim njësoj," tha Trump.

"Unë dhe Pompeo kemi proces të njëjtë mendimi," shtoi ai.

Presidenti Trump tha gjithashtu: “I uroj Rex Tillerson-it çdo të mirë.... E çmoj shumë angazhimin dhe shërbimin e tij dhe i uroj çdo të mirë. Ai është një njeri i mirë... Shkuam mirë për goxha kohë por kishim mosmarrëveshje për disa gjëra”.

Sakaq, Steve Goldstein, nënsekretari për diplomacinë publike tha se Rex Tillerson donte që të qëndronte në detyrë.

"Sekretari i kishte të gjitha qëllimet që të qëndronte, për shkak të progresit ë madh të bërë në sigurinë kombëtare”, - tha Goldstein.

Zyrtari shtoi se Tillersoni nuk shkoi për të folur me Trumpin dhe se nuk e dinte arsyen për këtë sipas CNN.

"Sekretari nuk foli me presidentin dhe nuk e di arsyen përse. Ai është mirënjohës për mundësinë që iu dha për të shërbyer dhe beson se shërbimi publik është një detyrë e fisme. Ai i uron sekretarit të emëruar Pompeo çdo të mirë”, - tha Goldstein.   

s.k/Shqiptarja.com