Një 46-vjeçar ka rënë në prangat e policisë në Durrës, pasi në dyqanin e tij u zbuluan qindra paketa cigare dhe fishekzjarrë të dyshuara të kontrabanduara.

Arrestimi u bë gjatë operacionit të koduar “Illegality”, të zhvilluar nga specialistët e Krimit Ekonomiko-Financiar të DVP Durrës. Sipas policisë, kontrolli u ushtrua në një dyqan në lagjen nr. 14, ku u konstatua se shiteshin cigare dhe fishekzjarrë të llojeve të ndryshme, të dyshuara të kontrabanduara. Po sipas hetimeve, pronari dyshohet se fshihte edhe të ardhurat e përfituara nga shitja e këtyre mallrave.

Në pranga përfundoi pronari i dyqanit, R. D., 46 vjeç, banues në Tiranë. Ai akuzohet për kontrabandë mallrash me akcizë, tregtim dhe ruajtje të mallrave kontrabandë, fshehje të të ardhurave, si edhe mospagim taksash e tatimesh.

Materialet i kaluan Prokurorisë së Durrësit për veprime të mëtejshme.

Njoftimi për shtyp 

"Zbulohet një dyqan ku shiteshin mallra të ndryshme të dyshuara të kontrabanduara.  Vihet në pranga pronari i dyqanit, i cili fshihte të ardhurat e përfituara nga shitja e mallrave.  

Sekuestrohen qindra paketa me cigare dhe fishekzjarrë, të dyshuara të kontrabanduara.  Në vijim të punës për parandalimin, evidentimin dhe goditjen e veprimtarisë kriminale në fushën e kontrabandës së mallrave, specialistët e Seksionit për Hetimin e Krimeve Ekonomiko-Financiare të DVP Durrës, bazuar në informacionet e siguruara nëpërmjet inteligjencës informative, finalizuan operacionin e koduar “Illegality”. 

Gjatë operacionit u ushtrua kontroll në dyqanin e shtetasit R. D., në lagjen nr.14, Durrës, ku nga kontrollet dhe verifikimet rezultoi se shiteshin fishekzjarrë dhe cigare të llojeve të ndryshme, të dyshuara të kontrabanduara, si dhe fshiheshin të ardhurat e përfituara nga shitja e tyre.   

Në vijim të veprimeve, u arrestua në flagrancë pronari i dyqanit, shtetasi R. D., 46 vjeç, banues në Tiranë, për veprat penale "Kontrabanda me mallra me të cilat paguhet akcizë ose me pezullim të plotë apo të pjesshëm nga detyrimet doganore ose të akcizës", "Tregtimi dhe transportimi i mallrave kontrabandë", "Ruajtja ose depozitimi i mallrave kontrabandë", "Fshehja e të ardhurave" dhe "Mospagimi i taksave dhe tatimeve".   

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme" \

-------------------------------
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë