Presidenti i Ukrainës, Volodymyr Zelensky, u bëri trysni liderëve të NATO-s të enjten t’i heqin të gjitha kufizimet ndaj Ukrainës në lidhje me përdorimin e armëve që ato ia kanë dhuruar, në mënyrë që Kievi të kryejë sulme thellë brenda territorit të Rusisë.
“Nëse duam të fitojmë, nëse duam të triumfojmë, nëse duam ta shpëtojmë vendin tonë, dhe ta mbrojmë atë, ne kemi nevojë për heqjen e të gjitha kufizimeve”, tha Zelensky të enjten në një konferencë për media përkrah shefit të NATO-s, Jens Stoltenberg.
Një ditë më parë, NATO-ja njoftoi një paketë të madhe me ndihmë ushtarake për ta mbështetur Ukrainën kundër luftës pushtuese, të cilën Rusia nisi në shkurt 2022. Ndihma përfshin dërgimin e avionëve luftarakë F-16, prodhim amerikan, si dhe një ndihmë ushtarake në vlerë 43 miliardë euro për vitin 2025.
Aleanca ka theksuar gjithashtu se Ukraina ka të drejtë të vetëmbrohet kundër agresionit të jashtëm dhe të vendosë për marrëveshjet e veta të sigurisë, duke deklaruar se “e ardhmja e Ukrainës është në NATO” dhe se Kievi do të mbështetet vazhdimisht në “rrugën e tij të pakthyeshme drejt integrimit të plotë euroatlantik”.
Më herët të enjten, Shtetet e Bashkuara njoftuan se do t’i dërgojnë Ukrainës pajisje ushtarake në vlerë 225 milionë dollarë, pjesë e një pakete prej 61 miliardë dollarësh e aprovuar në prill. Stoltenberg tha se, derisa Rusia ka tentuar “të na frikësojë për të mos e ndihmuar” Kievin, ka ndodhur e kundërta dhe aleatët e NATO-s janë “në fakt duke e shtuar mbështetjen për Ukrainën”.
Zelensky e ka cilësuar si të “suksesshme” ndihmën që i është ofruar vendit e tij gjatë samitit të NATO-s në Uashington këtë javë. Megjithatë, ai theksoi se Ukraina ka nevojë të ketë më shumë kontroll për t’i goditur objektivat thellë brenda territorit rus – posaçërisht avionët luftarakë që i përdor ushtria ruse për të hedhur bomba në Ukrainë.
Disa baza ajrore, ku ruhen ata avionë, ndodhen rreth 500 kilometra larg kufirit me Ukrainën, tha ai më herët gjatë kësaj jave. Më 10 korrik, Stoltenberg tha se Ukraina ka të drejtë me ligj ndërkombëtar ta mbrojë veten nga forcat pushtuese ruse, përfshirë duke kryer sulme të ligjshme ndaj objektivave ushtarake në Rusi.
Por, ai tha se çështja se si Ukraina mund t’i përdorë armët që i dhurohen, u takon vendeve anëtare të NATO-s të vendosin veç e veç. Disa vende i kanë dhënë leje Kievit t’i përdorë armët e tyre për sulme brenda Rusisë, derisa disa të tjera kanë thënë se armët e dhuruara nga to mund të përdoren vetëm brenda Ukrainës. Së voni, SHBA-ja dhe Gjermania i dhanë leje Ukrainës të kryejë sulme të kufizuara dhe të caktuar brenda territorit rus me armët e tyre./REL
Lajme të tjera
-
Protestat kundër Izraelit dhe NATO-s në Montreal, kryeministri Trudeau dënon dhunën
23 Nëntor, 22:08 -
Stuhi, reshje shiu dhe dëbore godasin Shtetet e Bashkuara
23 Nëntor, 21:12 -
Poloni, fermerët bllokojnë kalimin kufitar me Ukrainën
23 Nëntor, 20:39 -
Ministri Vengu takime me zyrtarë të lartë në SHBA: Shqipëria e angazhuar për forcimin e bashkëpunimit në mbrojtje dhe sigurinë globale
23 Nëntor, 19:32 -
Specialistja e Departamentit amerikan të Tregtisë: SHBA të interesuara të thellojnë bashkëpunimin me Kosovën për energjinë e pastër
23 Nëntor, 19:13 -
Alban Daci: Lufta III Botërore?
23 Nëntor, 15:23
-
Shefi i NATO-s takohet me Trumpin në Florida
23 Nëntor, 12:35 -
Angela Merkel intervistë për 'Corriere della Serra': Nuk e kërkova unë largimin e Berlusconit! Putin? I njihja synimet e tij, është një armik i Evropës
23 Nëntor, 11:23 -
Presidentja e Parlamentit të BE-së: Gjermania duhet t’i dërgojë Ukrainës raketa Taurus
23 Nëntor, 10:27 -
Reuters: Trump mund të emërojë Richard Grenell të dërguar të posaçëm për konfliktin mes Rusisë dhe Ukrainës
23 Nëntor, 10:20 -
‘Shikoni si bërtasin, para se të vdesin’, kush është Erald Alimehmeti, shqiptari i arrestuar në SHBA si përkrahës i ‘ISIS’
23 Nëntor, 10:01 -
Diplomati amerikan: Dialogu Kosovë-Serbi nuk do të jetë prioritet për administratën e Trumpit
23 Nëntor, 08:50
