STAMBOLL - Fuqitë e huaja dhe hebrenjtë shkaktuan trazirat në Turqi dhe punuan në mënyrë efektive për t’i rritur ato, ka thënë zëvendës Kryeministri Beshir Atalaj, raporton media turke “Hurryjet”.
 
Atalaj tha gjithashtu se “mediat ndërkombëtare kanë luajtur një rol të madh në konspiracion dhe i kishin zhvilluar trazirat mjaft mirë".
 
Zëvëndës kryeministri turk tha se ata që përpiqen të bllokojnë rrugën e Turqisë së madhe nuk do t’ja dalin mbanë.
 
“Ka disa grupe që janë xheloze ndaj rritjes ekonomike së Turqisë. Ju e keni parë qëndrimin e mediave të huaja gjatë incidenteve në parkun ‘Gezi’. Ata trasmetuan ngjarjet menjëherë, pa bërë një vlerësim të rastit”, ka shtuar Atalaj.
 
Protestat në parkun “Gezi”, pranë sheshit “Taksim”, filluan më 31 maj kundër planit të Bashkisë të Stambollit për të hequr të vetmen zonë të gjelbër.
 
Në fillim protestat ishin paqësore dhe nisën si çështje lokale kundër prerjes së pemëve. Por më pas protestat janë kthyer antiqeveritare, ku policia ka reaguar me forcë duke përdorur gazin lotsjellës dhe çisterna uji në disa qytete kryesore të Turqisë.
 
Në total, katër persona duke përfshirë edhe një oficer policie dhe tre protestues u vranë dhe më shumë se 7,000 njerëz u plagosën, sipas Shoqatës së Mjekëve turq.
 
Kryeministri Rexhep Tajip Erdoan në mënyrë të përsëritur ka fajësuar grupe të veçanta dhe mediat botërore për nxitjen e protestave.

Redaksia Online
(l.ç/e.s/shqiptarja.com)