TIRANE-Prokuroria për Krimet e Renda ka zgjatur me tre muaj afatin e hetimit ndaj ish-Kryeprokurorit, Adriatik Llalla. Hetimi ndaj Llallës ka nisur në mars të vitit 2018 për akuzat e "fshehjes së pasurisë", "mosdeklarim i të hollave në kufi", "pastrim parash" dhe "shpërdorim të detyrës".
Ish- Kryeprokurori ka bërë ankim në Gjykatën e Shkallës së Parë të Krimeve te Renda kundër zgjatjes së afatit, kërkesë që pritet të shqyrtohet nga gjyqtari Bib Ndreca. Pas nisjes së hetimit, Llallës iu sekuestrua pasuria me vlerë një miliardë lekë. Një apartament banimi në Durrës dhe mijëra katrorë tokë arë në Tiranë janë disa nga pronat që iu sekuestruan Lllallës.
Llalla i shpëtoi procesit të Vettingut, pasi paraqiti dorëheqjen nga sistemi para Komisionit të Pavarur të Kualifikimit. KPK-ja pranoi kërkesën e Llallës duke e nxjerrë nga sistemi dhe duke mos kaluar në Vetting. Komisioneri Publik ankimoi pranë Kolegjit të Posaçëm të Apelimit, vendimin e KPK-së. Në 11 qershor, KPA shqyrtoi kërkesën e Komisionerit Publik, dhe vendosi të linte në fuqi vendimin e KPK-së duke e lënë Llallën jashtë sistemit dhe pa kaluar në Vetting.
Pas largimit të Llallës nga posti i Kryeprokurorit, Departamenti i Shtetit ndaloi publikisht hyrjen e Adriatik Llallës dhe familjes së tij në Shtetet e Bashkuara, me argumentin se “ka informacione për përfshirje të tij në raste domethënëse korrupsioni”.