Zyrtarja e lartë e DASH viziton Shqipërinë më 28 prill, Kim: Do të theksojë nevojën për zbatimin e Reformës në Drejtësi dhe luftën ndaj korrupsionit

Zyrtarja e lartë e DASH viziton Shqipërinë më 28 prill, Kim: Do të theksojë nevojën për zbatimin e Reformës në Drejtësi dhe luftën ndaj korrupsionit

Karen Donfried

Zyrtarja e lartë e Departamentit Amerikan të Shtetit (DASH), Karen Donfried, ndihmës Sekretare për Byronë e Çështjeve Evropiane dhe Euroaziatike, do të vizitojë Shqipërinë më 28 prill, në kuadër të një turi që do të zhvillojë në Ballkanin Perëndimor, nga data 25 deri më 29 prill.

Në lidhje me vizitën e saj në vendin tonë ka reaguar edhe ambasadorja amerikane, Yuri Kim, e cila ka zbardhur edhe axhendën e saj, ku nëvizon se Donfried do të theksojë nevojën për të zbatuar plotësisht reformën në drejtësi dhe për të luftuar korrupsionin.

'Më 28 prill ajo do të përkujtojë 100 vjetorin e marrëdhënieve diplomatike SHBA-Shqipëri dhe do të falënderojë Shqipërinë për partneritetin tonë në Këshillin e Sigurimit të Kombeve të Bashkuara dhe për angazhimin e saj ndaj sovranitetit dhe integritetit territorial të Ukrainës përballë agresionit rus. Ajo do të nënvizojë gjithashtu mbështetjen tonë të fortë për anëtarësimin e Shqipërisë në BE dhe integrimin ekonomik rajonal, si dhe do të theksojë nevojën për të zbatuar plotësisht reformën në drejtësi dhe për të luftuar korrupsionin.'- thuhet në njoftimin DASH.

Gjithashtu Dr. Karen Donfried do të vizitojë Ballkanin Perëndimor, me ndalesa edhe në Bosnje dhe Hercegovinë, Kosovë, Mal të Zi, Maqedoninë e Veriut dhe Serbi.

Më 25 prill, ajo do të falënderojë Kosovën për strehimin për afganët dhe ukrainasit, do të inkurajojë punën në reformat për konsolidimin demokratik dhe integrimin në institucionet evropiane dhe euroatlantike, dhe do të shqyrtojë perspektivat për përparim në dialogun e mbështetur nga SHBA, të lehtësuar nga BE-ja me Serbinë, drejt një marrëveshjeje për marrëdhënie të normalizuara të përqendruara në njohjen reciproke.

Ajo do të udhëtojë në Serbi më 26 prill për t'i kërkuar Serbisë të avancojë reformat për integrimin e saj evropian, të përmirësojë stabilitetin dhe prosperitetin rajonal, të diskutojë mundësitë për diversifikimin e mëtejshëm të energjisë dhe të zgjerojë sigurinë dhe lidhjet tona dypalëshe ekonomike. Ajo do të përsërisë nevojën që Serbia dhe Kosova të riangazhohen në Dialogun e lehtësuar nga BE.

Më 27 prill, në Bosnje dhe Herzegovinë (BiH), Dr. Donfried do të inkurajojë zyrtarët të rifillojnë pjesëmarrjen institucionale në të gjitha nivelet e qeverisjes për të çuar përpara funksionalitetin dhe reformat e arsyeshme për prosperitet më të madh dhe që Bosnje-Hercegovina të marrë statusin e kandidatit në BE. Ajo do t'i kërkojë Bosnje-Hercegovinës të mbajë zgjedhjet në vjeshtë dhe të bëjë përparim në luftën kundër korrupsionit endemik.

Në Maqedoninë e Veriut më 28 prill, ajo do të takohet me udhëheqësit e qeverisë për të sinjalizuar mbështetjen e fortë të SHBA për negociatat e anëtarësimit të Maqedonisë së Veriut në BE dhe për t'i falënderuar ata për ndihmën e tyre të vazhdueshme për Ukrainën. Ajo do të nxisë anëtarin më të ri të NATO-s që të vazhdojë bashkëpunimin e ngushtë për një sërë çështjesh rajonale, të sigurisë dhe të mbrojtjes për të promovuar demokracinë dhe stabilitetin rajonal.

Dr. Donfried do të udhëtojë në Mal të Zi më 29 prill, ku do të theksojë mbështetjen e SHBA-së dhe nevojën për të përshpejtuar punën në rrugën euro-atlantike të Malit të Zi dhe pranimin në BE, forcimin e anëtarësimit në NATO dhe mbështetjen e vlerave të përbashkëta, duke përfshirë trajtimin e korrupsionit. Ajo do të falënderojë gjithashtu Malin e Zi për bashkimin me sanksionet e BE-së ndaj Rusisë në mbështetje të Ukrainës, për ofrimin e ndihmës humanitare dhe të sigurisë, si dhe për mbylljen e hapësirës së tij ajrore ndaj avionëve rusë.

M.Q./Shqiptarja.com
Komento

KUJDES! Nuk do të publikohen komente që përmbajnë fjalë të pista, ofendime personale apo etiketime mbi baza fetare, krahinore, seksuale apo që shpërndajnë urrejtje. Në rast shkelje të rëndë të etikës, moderatorët e portalit mund të vendosin të bllokojnë autorin e komentit, të cilit do t'i ndalohet nga ai moment të komentojë te Shqiptarja.com

Komente

  • Shefi i Psikiatrise: 22/04/2022 10:05

    Rekomandoj qe Saliut dhe Likes,me dt 27'te tu jepet anti-stresant dhe ilac gjumi.Daten 28'te ta kalojne ne gjume te thelle.Gjithashtu tu keshillohet qe ate fund jave te mos lexojne shtypin,por per tu inkurajuar te degjojne/shikojne Andin dhe Cim Peken. Sherbimi Kardiologjik te jete ne gjendje gatishmerie ! Shefi i Psikiatrise

    Përgjigju
  • Piku: 22/04/2022 08:09

    Horrorr

    Përgjigju
  • Sondazhi i ditës:

    Shqipëria luan ndaj Italisë sfidën e parë në Euro 2024, kush fiton?



×

Lajmi i fundit

Biden zgjat urdhrin për gjendje të jashtëzakonshme për Ballkanin Perëndimor

Biden zgjat urdhrin për gjendje të jashtëzakonshme për Ballkanin Perëndimor