TIRANË - Aksidenti horror i ndodhur në fshatin Kapshticë të Devollit, ku humbën jetën dy gra dhe një fëmijë 4 vjeçar, ka përgjegjës Olsi Belortajaën, agjent doganor në pikën e kalimit kufitar Kapshticë, i cili më 30 qershor 2019 drejtonte makinën në gjendje të dehur në masën 0.85 mg/l.
Anjeza Goni, 32 vjeç, Vamira Çuko 34, dhe djali i saj 4-vjeçar Semi Çuko, i cili për dy javë nga tragjedia do të festonte ditëlindjen, u përplasën për vdekje nga makina, ndërsa Olsi Belortaja, u largua nga vendi i ngjarjes duke mos i dhënë as ndihmën e parë. Hetimi i kësaj çështje ka zgjatur tre muaj dhe është menaxhuar nga prokurori i Korçës Julian Kristo, i cili ka dërguar dosjen në gjykatë, ku i pandehur është marrë Olsi Belortaja.
Ngjarja e rëndë ka ndodhur në 30 qershor 2019 rreth orës 18:30, Olsi Belortaja ishte duke qarkulluar si drejtues me automjetin e tij të markës Benz me targë KO7750B në rrugën nacionale Kapshticë-Bilisht. Në kryqëzimin e saj me rrugën e fshatit Kapshticë ishin duke udhëtuar si këmbësorë Anjeza Gani, Valmira Çuko dhe Semi Çuko. Në këtë vend, Olsi Belortaja ka ulur kokën për të kërkuar celularin dhe si pasojë automjeti ka humbur kontrollin dhe ka goditur këmbësorët Anjeza Gani dhe Valmira Çuko, të cilët kanë ndërruar jetë menjëherë pas aksidentit dhe ka goditur të miturin Semi Çuko, që ka qenë në gjendje të rëndë shëndetësore, por që ka humbur jetën më pas.
Menjëherë pas aksidentit Olsi Belortaja, ka zbritur nga automjeti një person që kishte pasagjer, dhe është larguar nga vendi i ngjarjes.
Më pas është njoftuar Policia e Shtetit, që në ndjekje e sipër ka diktuar makinën në fshatin Cangonj dhe i ka bërë me shenjë që të ndalonte, por ai ka vazhduar ndjekjen dhe është kapur në afërsi të fshatit Zëmblak nga punonjësit e Policisë Rrugore. Në vendin e aksidentit janë mbledhur shumë persona, të cilët u ndodhën rastësisht në vendin e ngjarjes dhe më pas kanë dërguar viktimat nga aksidenti për në Spitalin Rajonal Korçë.