MILOT- Ylli Ibrahimi, 45-vjeçari ishte duke ecur qetësisht në rrugë në qendër të qytetit, i shoqëruar së bashku me 2 shokë, kur 2 persona me motor vijnë me shpejtësi dhe qëllojnë me armë në drejtim të tij! Report Tv ka siguruar videon nga ky atentat mafioz në qendër të Milotit, ku mbeti i plagosur 45-vjeçari, teksa fatmirësisht 2 shokët kanë shpëtuar mrekullisht.Siç shihet nga videoja, autorët të maskuar me skafandër dhe kapuçin e xhupit kanë qëlluar disa herë me breshëri në drejtim të 45-vjeçarit, duke e lënë të plagosur. Plumbat e kanë prekur në gjymtyrët e poshtme, duke i shkaktuar dëmtime të shumta. Ai i është nënshtruar një ndërhyrje kirurgjikale në Spitalin e Traumës në Tiranë dhe pas përmirësimit të gjendjet shëndetësore prite të merret në pyetje nga hetuesit, pasi dëshmia e tij shihet si një provë mjaft e rëndësishme për të hedhur dritë rreth ngjarjes.Referuar gëzhojave të gjetura në vendin e ngjarjes, dyshohet se arma e përdorur për ekzekutimin e 45-vjeçarit është ‘Scorpions’. E gjithë skena është parë nga dhjetëra kalimtarë, nisur nga fakti që ngjarja ka ndodhur mes ditës dhe në qendër të qytetit. Mësohet se policia ka shoqëruar dhe marrë në pyetje disa persona në lidhje me ngjarjen, por dëshmia e tyre nuk e ka orientuar grupin hetimor drejt një pistë konkrete hetimi.