SHKODER - Vritet me armë zjarri në derë të shtëpisë në Dukagjin një 43-vjeçar, baba i tre fëmijëve, rreth orës 11:40 në fshatin Sumë, Njësia Administrative Pult, Shkodër.
Gjergj Krygja është qëlluar pranë banesës së tij në fshat, në rrethana ende të paqarta. Por paraprakisht, prerja e paligjshme e druve dhe konkurrenca dyshohet se janë pista kryesore e hetimit ku është përqendruar policia.
43-vjeçari jetonte në Shkodër por kishte shkuar të mblidhte zahiretë e dimrit në shtëpinë në fshat. Gazetari i Report Tv, Ergys Kavaja, raporton se në zgjedhjet e vitit 2015 Krygja, ka qenë komisioner i Partisë Socialiste, pikërisht në Qendrën Vendore numër 0092 ku në atë kohë PD denoncoi PS-LSI për vjedhje të votave.
Kjo është një foto e Krygjës, kur ishte komisioner, e shkëputur nga një video që publikoi PD-ja në atë kohë përmes Eduard Halimit, ku pretendonin vjedhjen e votave.