Kreu i Partisë Demokratike, Lulzim Basha, ka zhvilluar këtë pasdite takime me biznese dhe qytetarë, në qytetin e Kavajës, me të cilët ka diskutuar mbi problematikat kryesore të jetës së tyre të përditshme.
Mes të tjerash, Basha iu është drejtuar qytetarëve të Kavajës, duke iu thënë se “Zëri i Kavajës ka qenë zëri i ndryshimit, gjithmonë dhe kёshtu do tё jetë edhe kësaj radhe”. Por ndryshe nga takimi i parë ku u shkelën masat anti COVID, Basha në këtë takim ka porositur qytetarët që të ruajnë distancën.
“Njё porosi ju lutem, mbajmё pak distancë sepse jemi shumë afër njeri-tjetrit. Ju falënderoj nga zemra. Bashkё pёr ndryshimin. Rama ik! Shqipёria fiton”, tha Basha më tej duke u kërkuar të mbajnë distancën.
Kryetari i opozitës u shpreh se fokusi i qeverisë që do dalë nga zgjedhjet e 25 prillit do të jetë ringritja ekonomike dhe mbështetja e lehtësimi i bizneseve.
“Gjëja e parë që do të bëjmë është që të investojmë, që ekonomia të fillojë, të punojë në mënyrë që të rritet fuqia blerëse e njerëzve, t’i rikthehen normalitetit, t’i rikthehen mundësisë për të fituar gëzime dhe në veçanti do të jetë në vëmendje biznesi dhe sipërmarrja e grave. Për sipërmarrjen e grave ne do të kemi masa të veçanta të cilat do t’ju mbështesin dhe do t’ju mundësojnë që gruaja shqiptare jo vetëm të mos shkurajohet, por të inkurajohet për të qenë pjesë e ekonomisë shqiptare”, tha Basha.